نشيد تالتة تالت
تجاوباً مع ابنتي الغالية شيرين سامي وهذا النشيد ألفته
ذات يوم (مش حاقول من أد إيه )وكان من نصيبي
إني اكون الرائدة (المدرسة المسئولة )عن كل مايخص هذا الفصل
ومن الطرائف التي أحب أن ارويها هنا لأنها من أظرف وأطرف المواقف التي مررت بها هذه القصة :كنت في اول سنوات
تعييني وكنت ادرس مادة العلوم لجميع فصول المدرسة
(8 فصول )بحالهم ...وكانت المدرسة كلها دور واحد
على شكل حرف uوالفصول كلها ارضي ..يعني اللي ماشي برة
يسمع الكلام اللي بيدور في الفصول ..وكان فصل تالتة تالت ده
من أسوا الفصول في كل المواد وخصوصاًانه كان الفصل الوحيد
الفرنساوي عشان كل الطلبة فيه مجاميعهم بسيطة وبالتالي
مايدخلوش انجليزي ..وكنت انا من حظي السيء رائدة هذا الفصل
ومدرسة العلوم بتاعتهم ..وفي يوم من الأيام جه الموجه (المفتش)
وماكانش لسه دخل أي فصل ..وبعدين الراجل فايت
بالصدفة من قدام تالتة تالت دول ودول فضلوا قاعدين
وكأن على رؤوسهم الطير ..حتى مر الموجه من أمام الفصل ولم يدخل ....وما أن عبر الموجه باب الفصل ولم يدخل
حتى نطق الجميع بالصوت الحياني :الحمد للللللللللللللللللللللللللللللله ..وما أن انتهت الحصة وخرجت لألتقي
بالأستاذ ليون -الموجه -رحمه الله حتى سألني سؤال سريع وصريح وواضح :هم العيال دول مستواهم عامل إزاي عندك ؟؟؟
ورددت عليه بالطبع بمنتهى السرعة والصراحة والوضوح :
زي الزفت ..وفطسنا أنا وهو على روحنا م الضحك ..لأن الموقف كله كان مهزلة ..والحمدلله إنه كان شايف جهدي قبل كده في فصول تانية وإلا كانت حاتقلب بجد ..
المهم الفصل ده كان متعقد من الموقف العام اللي كل المدرسين
واخدينه منه فأنا عشان ارجعلهم الثقة بالنفس اللي هم مفتقدينها بشدة ..عملتلهم النشيد ده ...واسمعواكده :
احنا تالتة تالت ...كله تمام وثابت
ومهما الدنيا قالت ..حايفضل اسمنا
قالوا علينا كتير ..حكايات ولا في الأساطير
قالوا ده فصل خطير وبرضه ماهمنا
قالوا فصل فرنسي ..حانصبح فيه ونمسي
وليه يادنيا بتقسي ..علينا كلنا
فرنسي أو ألماني ..إيطالي أو إسباني
أمريكي والا يوناني ..دي العزة في دمنا
وكفاية كده عليكم
-رياضيات
للفنان حسين بيكار
علامة في علم الحساب محشورة في جداول الضرب
وعادات غريبة استوردها الشباب من بلاد الغرب
ويا ريتها علوم نافعة ..لكن تقاليع في غاية الكرب
000
وعلامة تانية ..شرطتين اشطر من ايدين حاوي
علامة شفت منها في حياتي الأهوال والبلاوي
علامة زي جذور الشر تنبت بلا تقاوي
علامة تخلي سعر الدهب أرخص من حفنة رغاوي
علامة في علم الحساب اسمها علامة يساوي ...!!!
000
علامة استفهام ؟
علامة كبيرةقد الجبل اسمها علامة استفهام
طول عمري شايلها على كتافي أسابق بها الأيام
لا مخلياني بالنهار ارتاح ولامخلياني بالليل أنام
ولا مخلياني ارجع ورا ولا أمشي خطوة لقدام
وياريتها سابتني لعمايا ..والا قادتلي شمعة في ضلام
000
يا معلمين الحساب
عايز معلم حساب يقوللي إيه الفرق بين ناقص وبين زائد
ويقوللي ليه إبن الحرام ماسك في ايده سبحة العابد
وليه علم الحساب ما قدرش يفصل الصالح من الفاسد
وليه كل خطوة نجاح ما بتسلمش من نظرة الحاسد؟؟
-الذبيحة ..!!
لأول مرة في تاريخ البشرية أقيم مزاد من نوع
جديد ..مزاد لذبح المشاعر ..لذبح الإنسانة
التي في داخلي ..
أقيم المزاد ..وتوالى الذابحون ..وكلٌ يجرب
سكينه مرة وراء الأخرى ...وواحد وراء الآخر
..وتم الذبح ...وكان من نصيب أصدأهم سكيناً ..
ولأول مرة يتم الذبح دون دم أو صراخ
فقد كانت شروطهم لدخول المزاد ألا تنزف الذبيحة
وألا تصرخ وألا تراق دموعها ..
وبالفعل اقمت بنفسي السدود على عروقي وعلى محاجري
فلم تنزف نقطة دم ..ولم تنزل من عيني دمعة ..
فقد جف الدم في عروقي ..وتحجرت الدموع في المآقي ..
ولم أملك سوى كلمة واحدة .."سامحكم الله "..يامن ذبحتم
فيّ إنسانيتي ..وقتلتم فيّ مشاعري ..
سامحكم الله ..ولي الله
000000000.
6-أجمل ما قرأت
×لا تضع وقتاً في السؤال عن سبب دموعي ...امسحها .
×احسن ما يدلك على مستقبلك ...ماضيك
×كنت ابحث عن الهدوء لكي أفكر ..الآن ابحث عن الهدوء
لكي أبكي على ما أفكر فيه ....أنيس منصور
×قيل لسقراط :ماهي أفضل إمرأة في نظرك
قال :هي التي تعلمنا كيف نحب ونحن نكره
وكيف نضحك ونحن نتألم ..
×ما أضيق فكري ..ما دام لا يتسع لأي فكر..(ميخائيل نعيمة)
