Powered By Blogger

الاثنين، 30 يناير 2012

إحنا.....ومعرض الكتاب ...







توأم ..روحي


زمان كان فيه غنوة حلوة قوي لراغب علامة كان بيقول فيها :


أجمل حاجة ياروحي ...إنك توأم روحي


المعنى الجميل ده حسيته النهاردة أولاً بين كل

اللي حضروا من الشباب وبين بعض ...ثانيا

بيني وبين كل اللي حضروا(وإسمحولي أحط نفسي

معاكم في طابور هذه التوأمة الروحية التي احسستها الليلة )

العيون كلها تلمع بالحب ..القلوب كلها بينها قنوات مفتوحة بالحب

الكل في عرس والكل يبحث عن العروسة والثلاث عرسان

والكل يبحث عن الكل :من حضر ؟من لم يحضر بعد ؟

اقولكم على سر ؟لأول مرة أحس إن كلمة "ماما زيزي "

لها هذا الصدى وهذه اللمعة في العيون ..

مش باقولكم كان مهرجاناً للحب ...

ونبتدي الوصف للي ماراحش عشان باتمنى
اكون أول واحدة توصف ..

شوفوا بقى أنا وصلت أول واحدة لامحالة ..

لأن ساعة ما وصلت كانت الساعة حوالي

الواحدة والنصف ظهراً ..

لفيت شوية على بعض المكتبات الخارجية

ثم أخرجت من شنطتي خريطة الإبن العزيز ماجد القاضي

اللي نقلتها بالأمس حرفياً من مدونته ..

وبالفعل كانت الوصفةسهلة ووصلت للخيمة 2


فاضل بقى ايه؟قولوا انتوا بقى ...

ايوه فاضل المكتبة فين ؟؟؟

حالاً طلعت المستند التاني اقصد الخريطة التانية ...

اللي بتحدد مكان الدار وموقعها من كل الجهات ..

على طريقة ماتشات الكورة ..

يعني لو دخلت من مدرجات الأهلي حيكون

الجمهور على يمينك والمكتبات على شمالك ..

المهم بمنتهى السهولة برضه وصلت للدار ...

ويادار مادخلك شر ..

فاضل ايه بقى ؟؟؟؟فاضل الوقت يعدي أو حتى حد ييجي ..


فجأتن العصر إدن ..قعدت ادور على مصلى اصلي فيه ..ولقيت في آخر الخيمة


بس طبعاً كان الرجالة بيصلوا فإستأذنت الحرس إني اقعد لحد مايخلصوا صلاة ..

ونظراً لصغر المصلى كان صفين يصلوا ويخرجوا ويدخلوا صفين وهكذا ..

حتى قلقنا أنا والكام ست اللي عايزين يصلوا ..وقلنا خلاص نصلي ورا جنب الحائط


وفي اللحظة دي رن الموبايل وكانت أول بشرى :جاء دكتور صبري عبد القادر


"أبو عمر "صاحب مدونة "غريب على الطريق "..


وقلت فُرجت ودخلت صليت العصر وذهبت أمام


الدار مرة أخرى على أمل أن يصل دكتور صبري


وبعد فترة اتصلت به وجدته عند المقهى الثقافي..وبالفعل

ذهبت ووجدت هيصة اتاري كان هناك الثوري علاء عبد الفتاح ..

المهم بعد أن عزمني د.صبري مشكوراً على نسكافيه ..

ذهبنا مسرعين لنلحق بعُرس الخامسة ..

وهو عرس المبدعين أستاذ ماجد القاضي


كتاب"وداعاً للسيد "

والأستاذ فتحي المزين ..

كتاب "18يوم "


وكان الدكتور صبري يحمل في يده عدة نسخ لجميع من سيوقعون الليلة ..


وكان يتمنى لو كان هناك وقت لقراءة بعض من محتواها ومناقشة المؤلف

كلٌ في مؤلفه ..ولكن من حظهم أي المؤلفين أنه لم يجد هذا الوقت ...


ووصلنا للدار وكان الأستاذ فتحي المزين قد وصل من فترة وكنت قد رأيته


منذ حوالي الساعة الثالثة والنصف ولكني لم أكن اعرفه بالطبع ولو كنت أعرفه لوقعت على نسختي قبل الزحمة ..

وقابلنا الأستاذ فتحي بالترحاب وخفة الظل المعهودة فيه كما يبدو من أول وهلة ..

ولاأنسى زوجته الفاضلة المهذبة التي تشع نوراً اينما حلّت..

ووقع لنا على نسخنا وفي هذه الأثناء وصلت عروس الحفل الدكتورة شيرين متلألأة

كعادتها ..ومعها زوجها المحترم النبيل واولادها الغاية في الطعامة آمن وجوري ..

ثم حضر بعد ذلك العريس الثاني الأستاذ ماجد القاضي ..انسان في غاية الأدب والرقي ..


وأخشى أن تكون شهادتي فيه "مجروحة "لأننا نحن الإثنين علوم ولكن هذه شهادة لله

أما زوجته الفاضلة فحدث ولاحرج ..والطيور الفاضلة على أمثالها تقع ُ..

واختلطت الأعراس عرس الخامسة مع عرس السادسة ..

وبالطبع كلكم عارفين عُرس السادسة كان عُرس ميييييييييييييييين ؟؟


قولوا انتوا بقى ..ايوة كان عرس شيرين سامي


كتاب "بنكهة مصر "

والعريس التالت مين ؟؟؟؟

ايوه...الأسمر أبو ضحكة ترد الروح اعرفه من بين مليون انسان ..

الشاب الحليوة "محمد الجيزاوي "

كتاب "في صحتك يا وطن "

ياه على الجمع الغفير اللي كان حاضر ..

نكمل بقى جت الثورجية اللي باتمنى كل ثورجية مصر يكونوا في الرقة دي والطعامة دي ......والحماسة دي .......أيوه ياولاد ...هي فاتيما

القائدة اللي مخلية قضيتها الأولى مصر في كل مكان بتروحه ...

وياسلام على الأستاذ فاروق الأب الحنين وهو يوزع حنيته وبسماته على الجميع

وطبعاً اولهم فاتيما ..وننتقل إلى مكملات اللطافة والظرافةللفاروق الأعظم ..

البنتين الحلوين ..قوي قوي قوي ..

امهات دم خفيف قوي قوي قوي "هبة وكارولين"

ولكن للأسف زوغوا مناّ مبكراً وكنا نفسنا يفضلوا وقت اكتر لكن معلش تتعوض ..


فاضل مين ما جبناش سيرته ؟؟؟
أنا بصراحة أزعل قوي لو ماجبتش سيرة الكل الليلادي..
لزماً وحتماًأجيب سيرتكم نفر نفر عشان تحرموا تروحوا معرض
تكون فيه ماما زيزي بعد كده ..كان فيه طبعاً الشباب الحليوة أحمد مصطفى
وأزهري ومينا ولاأنسى أحمد ديمو"مدونة يوميات مجهول"..وفي وسط الزحمة كنت ما أزال ابحث عن اتنين ..

واحد اعرفه وشفته قبل كده وبالطبع هو ابراهيم رزق "رشدي أباظة التدوين"والتاني اعرفه برضه بس ماشفتوش قبل كده وكان فعلاً نفسي أشوفه قوي عشان أحس إن يومي كملت بهجته ..عارفين مين ؟؟؟

ومن لهفتي عليه لما سبت المكان شوية عشان اروح اصلي المغرب أول ماشافوه قالوله ماما زيزي بتدور عليك ولما رجعت لقيت الكل في نفس واحد بيقولولي رامي اهو ..ولقيته كما توقعته طيبة واخلاق واحساس كامن جوايا إني شفته قبل كده ..

واتلفت ّ حواليا لقيت الفتى مهران الشهير بإبراهيم رزق وصل ..وبعدين سلمت عليه بحرارة تعجب لها سيد فاضل يقف بالقرب مناّ فأفهمته أنهم كلهم بمثابة أولادي ..

وعلمت من ابراهيم فوراً انهذا الأب الفاضل هو والد كارولين التي ما أن عرفها ابراهيم عليا :"ماما زيزي ""حتى وجدت عينيها الجميلتان تمتلئان بالحب المتبادل 

بيني وبينها على الورق ..اظنكم متشوقون لتعلموا من هي التي خطفت مني القلب قبل العين بملامحها الطفولية البريئة ...إنها كارولين بنت المنيا 
التي بادرت باقتراح في نهاية اليوم وافق عليه الجميع والمهم التنفيذ :
وهو أن نقوم جميعاً برحلة للمنيا تعد هي لها وترتب لنا المزارات التي يمكننا زيارتها ..

ومر الوقت سريعا ..وكانه كان ثواني لاساعات 

وتمنيت أن يكون الجميع معنا في هذا العرس ولكني قد حاولت

أن أنقله إليكم فهل إستطعت ذلك ؟؟؟اتمنى ..

ملحوظة :اترك النقل بالصور لشيرين وللأستذ ماجد وغيرهما ونبقى كلنا كملنا بعض ..تحياتي

ملحوظة تانية :يرجى من ابنتي كارولين (كاندي )انها تخبرني فوراً

متى ستكون في المعرض بالتحديد هل ستكون يوم الأربعاءأول فبراير

والا يوم الأحد 5 فبرايرمع توقيع كتاب الدكتور مصطفى سيف ..

وإذا كانت حاتروح يوم الأربعاء حاتكون من الساعة كام هناك؟لأنني لم أكن أعرف أنها ستوقع كتابها "دوامات العيش الحاف " اليوم"الإثنين 30 يناير صباحا ً
ولذلك عايزة اشوفها ضروري حتى اتناول نسخة من الكتاب مهمورة
بتوقيعها الكريم ولي الشرف ..أنا عموماً كتبتلها المعنى ده في مدونتها لكن خايفة ماتقراش مدونتها حالياً لوجودها في مصر فيرجى ممن يعرفها أو يعرف موبايلها أن يخبرها بذلك وشكراً..

هناك 23 تعليقًا:

ابراهيم رزق يقول...

zizi العزيزة الذيذة

ايه السرعة فى النقل
انتى اسرع من الجزيرة و الCNN و ال BBC
معلش انا جيت متأخر قليلا و كنت مدهول لانى كنت مريض
لكن الحمد لله اليوم كان جميل و عقبال مصطفى سيف

تحياتى و تقديرى و حبى

aya mohamed يقول...

فرحانة جدااا حاسة زى ما اكون حضرت معاكم وكنت مستنيه اى حد يكتب عن حفلة دكتورة شيرين
يارب دايما متجمعين وموفقين

سواح في ملك اللــــــــــــــــــه- يقول...

الف مبروك لشيرين والجيزاوي

اكيد حضرتك كنتي منورة المكان

للاسف كان نفسي اكون موجود

بس كنت مشغول جدا

تحيتي لكي

فاتيما يقول...

مساء الفل يا ماما

انا بسجل اولا زعلى من الميكروباسات ف كافة أرجاء القاهرة والمحافظات كلها ..
عشان ملحقتش أسلم على حضرتك خالص
وقت المرواح

كنت فاكرة هننزل سوا ونتقابل ف رمسيس
بس اذ فوجئت ان السكة ع التحرير
وحضرتك روحتى

معلش

هنتسامح مع بتوع المواصلات
اكراما لكل الصحبة الحلوة بتاعت النهاردة

حضرتك كنتى نوارتنا بجد
وام كل الموجودين
والكل فرح بيكى وبوجودك جداااا
انا مش هقولك
انتى اكيد حسيتى بينا ..
:)

الف مبروك لكل اللى ليهم كتب
وما زلت اقول واردد
نجاحهم نجاح لينا
وكل كتاب ينشره مدون أعرفه
بحس ان ليا فيه نصيب
نصيب م الفرحة
والنجاح
والونس
عارفة حضرتك كدا زى ما نكون فصل المتفوقين ...
بحس ان الأوائل طلعوا من عندنا
فبفرح قوى قوى
وابقى فخورة بيهم كلهم والله

كل الحضور اللى حضرتك قولتيهم
كانوا رائعين
بس كاندى كانت مفاجأة فعلا
انا مبسوطة جدا انى قابلتها
و لما تقرى البوست دا
انا بقولها عندك اهو
لازم تيجى يوم الحد يا حتة الحلويات ..
ومعاكى الوالد العزيز

يا رب أشوف حضرتك يوم الحد
على الف خير

عشان نفرح بمصطفى سيف
وبـ لبنى وكل الناس الحلوة ...

اخيرا عشان الرغى بقى
ومصدعكيش
:)

ربنا يخليكى لينا
وتعيشى وتنورينا
وتزودينا
وتفرحينا
وعقباااااااالك يا ماما

مصطفى سيف الدين يقول...

انا فرحان و سعيد بالجو اللي حضرتك وصفتيه
الف مبروك لشيرين و ماجد و محمد وفتحي
طبعا حضرتك مش هتنسي تأخدي المشوار ده تاني يوم الاحد الجاي علشان ابنك مصطفى
ولا ايه النظام ؟
اكيد هاتشرف بحضورك ان شاء الله الساعة 6 يوم الاحد الجاي في نفس المكان

رؤى عليوة يقول...

والله انا غرت رغم انى فرحانه جدا بفرحتكم لكن كان نفسى كمان اشوفكم
لكن اعمل ايه بقى مش من القاهرة كنت هناك امبارح وطبعا مافتنيش ادور على الدار بالخريطة واحصل على كتب جميله

سعيدة لأصحابها بجد ومن قلبى وكان نفسى اشوفكوا بس اللقا نصييييب

دمتم بكل خير

zizi يقول...

معلش انا مش حارد على الكل دلوقتي لكن دا رد خاص لمصطفى ابني الغالي ..ازاي يا مصطفى يراودك فكرك مجرد مراودة اني ممكن ماجيش عرس إبني مصطفى ..لعلمك انا النهاردة كل كلامي مع الشباب عن الرؤية التانية يوم الحد الجاي يوم فرح مصطفى سيف هو انا اقدر ماجيش ياروح قلبي من جوه ؟؟؟دا إنت بقى لسه مش عارف غلاوتك عندي أد إيه ...تحياتي حتى نلتقي على خير ..

Unknown يقول...

ماما زيزي الحبيبة أنا مكسلة عن البلوجر اليومين دول بس دخلت مخصوص عشان حسيت إنك هتكتبي بوست زي السكر كالعاده :)
أجمل حاجه في اليوم بجد هي وجود حضرتك بينا كنتي منورانا :)
يا رب دائماً نتجمع على خير شكراً على الكلام الجميل ده و إن شاء الله نتقابل يوم الحد :)
أرق و أعذب تحية لكي

هبة فاروق يقول...

احلى شىء اننا نتجمع وانتى منوره وسطنا يا ماما يا سكره
بجد كان يوم جميل ضحكنا من قلبنا وفرحت جدا لاستاذ ماجد القاضى أستاذنا المهذب الراقى المتواضع ..يستحق اكثر من ذلك كان منور فى عرسه والله .وحصلنا على توقيع منه على الكتاب وبقوله الف الف مبروك يا استاذ وأتمنى ان يحقق هذا الكتاب النجاح والانتشار
وبقول مبروك لشيرين ولواننا ملحقناش التوقيع .أعذرينا يا شيرى
وكل اللى حضروا كانت عيونهم مليانه فرح كما وصفتى ..ربنا يجمعنا دايمافى الفرح
وان شاء الله نتجمع فى عرس مصطفى سيف ربنا يقدرنى واقدر احضر التوقيع
سلامى لكى يا ماما يا حته سكره

faroukfahmy يقول...

زيزى
اعلق شوية بالعامية ياعامة قلوب الناس
لانى احب النــــاس
والناس بالناس تنحب
لمينى الكل بحنان وبايد الحب
نورت وصولك ومعاكى كوكب حب
بكرتى مجيئك وناديتى الرب
وصليتى الشكر وسعيتى لكل محب
وباركتنى معانا ورحبتى كل قلب
جمعنا برغبة وشوق ولمه ماتتحسب
واخيرا هنيئا لكل من جمعنا تحت سحر البيان وعظمة الكلام
وموعدنا يوم الاحد مع ابن النيل المصطفى

نسرين شرباتي "أم سما" يقول...

على فكرة أنا اتغظت
علشان مكنتش موجودة
:(
:(
:(
كل الناس الجميلة دي كانت موجودة :)
ربنا يوفقهم كلهم ويهنيهم
وكلهم يستاهلوا كل خير

حنين محمد يقول...

مساء الغاردينيا ماما
وحشينيييييييي بجد وحشتيني وسامحيني ياامي لاني انقطعت عنك وعن حبايبي فترة بجد غصب عني يعلم ربنا قد ايه وحشيني وسوري لو قلت لك اني بغبطك على الجمعه الحلوة دي بجد ياليت كنت معاكم وشفت كل الي بعرفهم هنا بس كفايا اني بشوفكم بقلبي ومشاعري بجد والله انتو في قلبي ولازلت بوعد نفسي اجي مصر في يوم وتجمعي لنا كل الحبايب وطبعاً استاذ ابراهيم مش حينسى عزومته ليا ههههه << حدبسه :) "
؛؛
؛
بحبك
لروحك عبق الغاردينيا
كانت هنا
reemaas

Unknown يقول...

السلام عليكم

لك جزيل الشكر على هذا الوصف الجميل والحي.. كان شرف لي زيارتك الغالية التي أثمنها وأقدرها أشد التقدير.. والله أخجلتني كلماتك لكن أسعدتني روحك المرحة الجميلة التي كانت بالفعل لها تأثير لا يستهان به على جو الحفل..

جزاك الله خيرا على مجهودك ووقتك، وربنا يبارك فيكي وفي كل أسرتك.. آمين.

candy يقول...

ماما زيزى ...

بجد حضرتك كرة لهب مشتعلة بالحب والحنان والطيبة ..

أنا بجد مبسووووووووووووووطة جدا جدا جدا بالفرصة اللى سمحت أنى اشوف الكائنات التدوينية دى كلها .. وأنا لسة عند وعدى وربنا يقدرنى احسن استضافتكم وأتشرف بتجمع دافى راقى سامى يسخن الصعيد كله :)


ماكنتش مصدقة انى دى فتيما .. وقعدت اسأل الناس كلها همسا .. دى فتيما ؟؟ متأكدين ؟؟ علشان ما ابقاش عاملة زى الصعيدى اللى بياخد أى حد بالحضن فى محطة القطر ويقوله ازيك ياولد العم وبعدين يطلع مش هو :))
احبطت فى الأول انها ماعرفتنيش .. بس بعد كدة عرفتنى فخلاص سماح ;)

أستاذ ابراهيم رزق والسعولة ساليناز كانوا من المفجأت بالنسبة لى ، كنت حاسة أن الاسرة دى شخصيات خيالية زى شخصيات الكارتون من كتر الحكاوى اللذيذة اللى عليهم ..

زعلت لما حد -مش فاكرة كان مين- كلم الاستاذ فاروق وعرفت انه مشى .. لأنى كان نفسى أشوف هبة وكارولين جدااااااااااااااااا .. بس تتعوض لإن شاء الله ..

والشباب اللى كانوا موجودين كلهم -معلش عندى مشكلة فى الاسماء- بجد ناس محترمة جدا ودماغ جدا وبجد الدقاقيق اللى سمعت أى حد بيتكلم فيها إضافة إنسانية لىّ ..

ماما زيزي .. لو أعرف بيت حضرتك فورا هاكون عندك بنسخة .. أنا ما استحقش الاهتمام دا كله .. هاحاول أجى بكرة علشان شارك الزميل مصطفى فرحته ، وعلشان أشوف حضرتك وباقى الناس اللى استمتعت بيهم فعلا ..

وعلى فكرة أنتوا كلكم اثرتوا فى بابا جدا جدا .. ورجع عارف أن القاعدة اللى كنت بقعدها على النت مش كلها جيمز ;)

كفاية أنه أخيرا بقى عنده افكار ثورية .. غالبا من حديثة مع استاذ ابراهيم ولو انى ماعرفتش كانوا بيتكلموا فى إيه دا كله :))

ربنا يخليكوا لبعض .. ويبارك فيكم لمصر <3

معلش رغيت كتير .. بس من فرحتى :)

Carol يقول...

عجبني الاحساس ده قوي
كان نفسي أتعرف على حضرتك :)
نقلتي لي مشهد دافئ جدا و مليء بالبهجة :)

zizi يقول...

كاندي الجميلة ...انا مش قلت لك تعالي قضي معايا اليومين بتوع المعرض دول وانتي اللي افتكرتيني باهزر والله والله انا ماكنتش باعزم عزومة مراكبيةعموماً أنا مبسوطة إنك قريتي تعليقي عنك ورديتي بس على مايبدو إنك ربطتي بين النهاردة وبين حفل التوقيع بتاع الدكتور مصطفى سيف اللي لسه حايكون يوم الحد إن شاء الله ..ياترى انتي فاكرة كده والا إيه ؟واشكرك على كل المشاعر الحلوة اللي بتحمليها ليا وبرضه عندي منها الكتير ليكي وربنا يخليكي يارب ..تحياتي ليكي ولبابا تحية خاصة ..

... سعد الحربي ... يقول...

أمي الغالية ومن غمرتنا بقلبها الكبير وروحها العالية التي تعانق السحاب

بمجرد ما رأيت تعليقكي الكريم على موضوعي الأخير حتى بادرت بالتعليق على موضوع انا ..والناس ..

ولا أدري لماذا لم يظهر وقد تكون المشكلة لدي

بجد أمي أعتذر أشد الاعتذار منكم على انقطاعي عن إبداعاتكم وللأسف أنشغلت هذه الأيام عن الكثير.
لكن قلوبكم الكبيرة تغمرنا دوماً بمشاعرها الصادقة والرائعة.

أسعدك الله يا أمنا كما أنت منبر للصفاء والطهر والطيبة.

ابنك/ سعد

;كارولين فاروق يقول...

احب روحك المحبه للجميع
بارك الله فيك
كان يوم جميل فعلا
مبروك لماجد وشيرين
تحياتي العطره

rack-yourminds يقول...

كنت اتمني اكون معكم في هذا اللقاء الجميل ولكن انا مش من القاهره

تحياتي

كريمة سندي يقول...

باين عليه لقاء أكثر من رائع جمع بين الفكر والأدب والثقافة هنئيا لكم هذا التجمع الخير غاليتي ماما زيزي

ظلالي البيضاء يقول...

ماما زيزي ..
طيب أنا اعمل لإيه بقى .. لما قلبي وروحي معاكم بس بتفوتني الجمعة الحلوة دي ..
على كل الأحوال كويس إني شفت حضرتك فرحانة ..
أنا كنت بدور على شمعة الشهيد بس ما لقيتهاش ..

تحيتي لك ولكل من كان حاضراً في الحفل السعيد ده ..

الاحلام يقول...

كم اشتاق لرؤيه احباب يقتربون كثيرا الى قلبى يا لها من صحبه رائعه تملاءها الحب والصفاء والنقاء كم كنت اتمنى ان اقضى هذه الساعات القليله بجواركم جميعا فانتم يتشرف اى انسان الى مجالسته فانتم جميعا الطيبه والنقاء

تحياتى وتقديرى للجميع ابوداود

zizi يقول...

أحبائي :زي ما وعدت حاوفي وارد على الجميع :
ابراهيم رزق الف سلامة عليك وطبعاٍ انت بقيت زي الفل والحفلة كانت حلوة بيك ..

آية محمد :إيه رأيك في الوصف التفصيلي ده انفع معلق كورة ؟؟تحياتي وشكري

خالد العزيز طبعاً احنا سعدنا بيك بعد كده في حفلة مصطفى "أصل أنا راكبة آلة الزمن لورا شوية "..وربنا يجمعنا على خير ..

فاتيما :كل الكلمات لا تكفي فرحتي بيكم كلكم وباشكرك على كل الكلام اللي أرجو اكون باستحق ولو جزء صغنون منه فهذا يكفيني ويكفيني نظرات الحب في عيون كل ابنائي وبناتي ورنا يجمعنا على خير ..
مصطفى رديت عليه قبل كده ..

أمة الرحمن :إحنا اللي كان نفسنا نشوفك ياست الكل ..لكن معلش ملحوقة ..

شيرين الرقيقة :كنتي منورة الحفل وعقبال الكتاب المية ..

هبة الرقيقة ..انتم اللي كنتم منورين والحفل كان حلو بالجميع وتحسي ان كلنا قرايب وبلديات ..كان حلو فعلاً ..
فاروقنا المعظم ..ايه بس ياعم ياشاعر نورتنا بقدومك انت والنجمتين المتلألأتين هبة وكارولين ..
نسرين واحنا كمان كان نفسنا نشوفك وان شاء الله اول ما البنات يكبرواتجيبيهم وتيجي تحضري تجمعاتنا ..تحياتي

ريماس العسولة ..بس انتي تعالي وحاتشوفي المظاهرة اللي حاتكون في انتظارك ..وحشاني قوي يا بنت الإيه..تحياتي وحبي

أستاذ ماجد : انا اللي سعدت جداً بالتعرف على شخصك الكريم وهذا أضاف لي الكثير ويكفي أخلاقك العالية وذوقك الجم ..تحياتي

كاندي ..رديت قبل كده ..

كارول :اتبسطت اني نقلت صورة واضحة ليكم كأنكم جيتوا ويارب اكون قدرت انقل نقل واقعي ..تحياتي وشكري

ابني العزيز سعد الحربي : اسعدتني بتواجدك ..وما يهمكش ليس بين الخيرين حساب واشكرك على كل الكلام الجميل ده ويارب اكون دايماً عند حسن ظنكم ان شاء الله ..

كوكي الجميلة ..ماهو انتم كلكم تستاهلوا تتحبوا يبقى لازم تتحبوا بالعافية دا شيء مش بإيدي اعمل إيه يعني ؟؟هههههتحياتي وشكري

rock-yourminds واحنا كمان كان نفسنا تكون معانا لكن ملحوقة المرة الجاية تعمل حسابك ان شاء الله ..

كريمة سندي هو فعلاً كان لقاء شامل ويمكن حاولت انقله بالتفصيل عشان تستمتعوا معانا..تحياتي وشكري

ظلالي البيضاء ..فعلاً كان يوم جميل ..بس إيه حكاية شمعة الشهيد دي مافهمتش ..تحياتي وشكري ..

أبو داوووووووووووووووووووووود : إحنا اللي كنا مفتقدينك لأنك كنت حاتكمل اللمة والصحبة الحلوة..ملحوقة في الجايات ..تحياتي وشكري ..

مع خالص تحياتي ..