Powered By Blogger

الجمعة، 9 مارس 2012

أوبريت الرئيس المجهول ..

أوبريت الرئيس المجهول

"مهداة إلى الشعب المصري الحائر منذ زمن في إختيار

رئيسه فهل يا تُرى سينجح هذه المرة ؟"

مصر :اللي يقدر على حزني يرفعه وانا منتخباه

واللي يقدر على زمني يسعده وانا اعيش وياه

عايزة جمال دا حبيب الكل

خلالنا نهارنا بقى زي الفل

وفجأة يا عيني اهو راح ولاطل

أهو راح ولاطل ...

زكريا محيي الدين :أهو أنا أهو أنا ولاحد ينفع إلا أنا

روسيا صحيح أكرهها موت ..لو حتى حامشي مع الطاغوت

وجمال سايبلي في البلد ..وصية ليا مع الولد

كان ٌقدامه أكبر عدد ..ما إختارش منهم إلا أنا

إستني عليا وفكري ..بعدين قوليلي كلمتك

بس ارحمي ..بس إقبلي ..وانا برضه راضي بقسمتك

مصر :كلام جميل وكلام معقول ما أقدرش أقول حاجة عنه ..

لكن جمال دا مش معقول مش لاقية فيك حاجة منه ..

علي صبري : من ناحية حكمي ومريستي ..أعجبكم موت ..

وإن مرة غلطّت إبقي يا ستي ..إرقعي ميت صوت

أقتل وادبّح واسّفّح كده بالملايين ..

واديكوا الفول والطعمية ويا التموين ..
شيوعي صحيح ماليش دوا ..لكني ماشي مع الهوى
القرض نقسمه سوا ..وروسيا راضية عننا

ندرٍ عليا لو قلتي أيوة لاخلي روسيا ف إيديكي شمعة ..

وأمريكا دي ولا تسوى عندي لو حتى كانت لكلامنا سامعة ..

مصر :كلام جميل وكلام معقول ....

جعفر النميري :  سيبك منهم دا مفيش غيري ..

قيمة ومركز وإسمي نميري ..

نعلن على طول الوحدة في وادي النيل

ونبقى سوا إيد واحدة كداهو يا جميل

ماعرفش لاكده ولاكده ..تكسبي ثواب ..ثواب

وجمال قاللي على كده وكنا اصحاب ..اصحاب

ماهو النظافة من الإيمان ..أما الطيابة دي في السودان ..

وشعبي كله ضعيف غلبان ..وارحمي بقى دانا انسا..سا ..ساااااااااااان

مصر :كلام جميل وكلام معقول ..

أنور السادات :جيتك من ميت أبو الكوم ..مغلوب على أمري ومهموم

وحياة مين سابهالنا في نور ..ما تخليني ارجع مذموم

كلمة واحدة تصير معاهدة بين اتنين ..بين اتنين

والجيش والشعب يكونوا معايا همّ الإتنين ..همّ الاتنين

وادبحلك كده عجل سمين

واقرا الفاتحة عالغايبين

وتصيري عاقلة وهمّ المجانين ..همّ المجانين

مصر :كلام جميل وكلام معقول ..

"يخرج جمال من قبره بمزماره السحري فتلقاه مصر ملتاعة
وهي تقول :

مصر :جمال ..سايبني أبكي عليك ياروحي من بدري ..

ياريت فيه رجعة ليك كنت ادفع لها عمري

كلمنا يا رئيسنا ..سايبنا وادينا لُصنا

كلمنا يا رئيسنا ..سايبنا وادينا لُصنا

مع خالص تحياتي وتمنياتي الطيبة لكل من سيرشح نفسه ..


هناك 8 تعليقات:

مصطفى سيف الدين يقول...

على فكرة يا ماما انا مش شايف جمال يفرق عن الباقيين كلهم ديكتاتوريين نفسي في حد يحترم آدمية المواطن
صحيح كان بيفكر في هموم الغلابة شوية بس كان مستبد برضه
كلماتك جميلة اوي

سواح في ملك اللــــــــــــــــــه- يقول...

مصر ياست الكل دي درة

جوهرة نادرة

مصر دي مهرة

مصر دي حرة

مصر دي بلد الشعب الصامد

بركان خامد

يوم مايحس الظلم الطاغي

يعمل ثورة

عايزة زعيم

يعرف معناها

عايزة رئيس بيحب بلاده

يعرف ان بلدنا دي قمرة

ياره عبدالله يقول...

السلام عليكم ورحمه الله وبركاته
يسعد مسائك يا ماما
جميل قوى الاوبريت ده
بس كلمه لجمال الهى ما يرجعك وكفايا الى انت عملته والى لسه بتعمله
وربنا يعين الرئيس القادم علينا ويصبره

m.hallawa يقول...

مساء الفل والورد والياسمين
علي أجدع أخت
عزيزتي الغالية جدا جدا شوفي الاي هايجي يجي ويكون زي ما يكون !!!
لانة بيبساطة في الوقت الحالي مش ها يكون أسواء من الاي كان !!!
غصب من علية ها يمشي كويس
لانة جدار الخوف زال والميدان موجود
والناس المحترمة كثيرة وكثيرة جدا !!!
وبعدين هو الاي ها يحكم ها يصرف علي البلد مثلا من جيبة الشخصي ؟؟ طبعا لا ولا هو المفروض موظف حكومي أعلي منصب وشكرا
المهم حسن أدارة موارد البلد ها نكون في أحسن مستوي في أقصر وقت
تسلم أيديكي علي البوست
رائع
مع خالص تحياتي

m.hallawa يقول...

نسيت أقولك
شكرا علي الزيارة الكريمة والمتابعة والتشجيع يا أجدع أخت ربنا ما يحرمني من مؤنستكم لي
تحياتي القلبية

شمس النهار يقول...

صباحك فل يازيزي
:)
جميييييييلة جداااااااا

بس ليه السطر الاسود ده
ارحمي نضارتي
:))

واضح انهم محضرينه وعارفينه
بس اهو وجع قلب وخلاص

faroukfahmy يقول...

اوبريت الرئيس المجهول
اللى يقدر على قلبى يخطفه وانا اعيش وياه واللى يقدر على قلبى .......
اللى عاش يازينب وقت جمال وكمال وقوام وهندام وسحر صوته مش هيلاقى زيه تانى مش هيتكرر
كمان روسيا كانت زمان ومهما طال الكلام مش هيرجع الزمان زى ماكان
المهم اننا كلنا اطمأنينا عليكى بعد غياب

اوعى تغيبى تانى .... وحشنى انور وجدى ابن الوايلى ياريت يظهر تانى ويدوب قلب ليلى بعد ما تعبت من التدوير والتخيير
واصبحى على خير

حنين محمد يقول...

صباح الغاردينيا ماما
وصباح حرية وسعادة لمصر الحبيبة
أتمنى فقط من سيصبح رئيساً لمصر أن يحب مصرو ترابها أن يكون وفياً لها ليصبح آمان لشعبها "
؛؛
؛
حفظ الله مصر وسخر لها من يضمد جراحها
لروحك عبق الغاردينيا
كانت هنا
reemaas