الثلاثاء، 5 يونيو، 2012

في انتظار اللاشيء..!!

جلست انظرلشاشة التليفزيون ..علني أجد شيئاً جديدا
يزيح تلك الجهامة التي انطبعت على وجهي فلم أجد سوى
هؤلاء الناس الذين يطلون علينا من كل حدبٍ وصوب وكل يدلي بدلوه وكأنه هو اللي "حايجيب التايهة "ولكن كانوا كما قال شاعرنا كمال عمار :كالباحث عن الضحكة في مأتم ..كالباحث عن لاشيء..

وفتحت صفحات جرائدي ولم تكن أسعد حظاً من شاشة التليفزيون ..فأغلقت الشاشة واغلقت الجرائد وخلدت إلى نومٍ عميق علني أجد في منامي مالم أجده في صحوي ..وللأسف هاجمتني الكوابيس فتارة اجدنا مثل العراق وتارة مثل سوريا وتارة مثلما كنا على مدار ثلاثون سنة مرت وكأنك يابو زيد ما غزيت ..ولم أجد حلاً سوى اللجوء للمصيف وهناك جاءنا البيان التالي :احكام جماعية بالبراءة..وحكمين بالبراءة المؤجلة للجلسة القادمة ..واستدعيت صورة سعد زغلول وهو يقول لصفية هانم زغلول :غطيني يا صفية ..مافيش فايدة


هناك 27 تعليقًا:

سواح في ملك اللــــــــــــــــــه- يقول...

فيه فايدة ياست الكل

فيه فايدة

برعم كل مانراه لكن عندي امل

ان مصر هتتغير للاحسن

تحيتي ياستنا

محمد الجرايحى يقول...

التمسك بالأمل ...هو سر البقاء

شيرين سامي يقول...

جايه بس أقول...

وحشتيني

:)

دعاء العطار يقول...

كنت متشائمه جدا بعد الانتخابات وكنت رافعه شعار " مفيش فايده " بس لما الاحكام صدرت والميادين اتملت تانى واتجمعنا قلت لا اكيد ف امل

ياااارب يعدى الازمه دى ع خير ويحفظلنا ثورتنا عشان ارواح ماتت وعيون فقدت ياارب

........

حمدالله ع سلامتك يامامتى وحشتينا :)

شمس النهار يقول...

طيب كويس انك عرفتي تنامي
:))
ازيك ياجملة يارب تكوني بخير

ahmed said يقول...

مســاء الأمل وحُسـن العمــل :
" مـامــا زينــب "
:
بدايةً أرحب بكِ بعد غيـاب طال ،
وطـال معه معاني جلية لا نتذوقها
ولا ندركهـا إلا في هذا المكـان ،
النقي الصفي .
:
يقول الكثير بأن الإنسان ..
" مُسير وليس بمُخير "
وأقول بحول الله ...
بأن الإنسان مُسير فيمـا خُير له !
فالخير من عند الله ، والشر من أنفسنـا !
لقد قامت هذه الثورة بقدرة الله
ومشيئته .. لأن الطغيـان فشى وانتشر !
فأراد سبحانه وتعالى بأن تعلو
كلة الحق وتكون العُليا ، ليرجع الأمر
إلي نصابه الطبيعي ،
وبقوة الإيمان الراسخ في قلوبنا
نأمل الخير بمشيئة الله ونصرته ,
فمهما طالت شمس الظلم ..
إلا وعتمة الليل تنتظره لتوئده في ظلامه
أدرك جيداً ما تعانين منه ،
فالجُرح واحـد ,,
ورحمة الله واسعة بأمره تضمد كل الجروح ،
نسأل الله تعالى ان يحفظ مصرنا
وان لا يؤاخذنا بما يفعل السفهاء منا
لروحكِ السلام و السكينة
وأمان يغمرك .

..
..

أحمــ سعيـد ــد

ريـــمـــاس يقول...

صباح الغاردينيا ماما
الأحوال معقدة والأحداث مؤلمة
ولكن أبقي على الحلم
وتسلحي بـ الأمل
وألهجي بـ الدعاء
فابد هناك فجر بعد عتمة "
؛؛
؛
ماما زيزي
وحشتيني فلا تغيبي حتى لايغيب الحنان ياطهر الأرض وعبق النقاء "
؛؛
؛
لروحك عبق الغاردينيا
كانت هنا
reemaas

ابراهيم رزق يقول...

zizi العزيزة الذيذة

كلنا تخطينا مرحلة انتظار اللاشىء
الى مرحلة ما بعد اللاشىء

تحياتى

wessam يقول...

العزيزه ماما زيزى الاول اتمنى لم مصيفا خاليا من السياسه
لان الساسه والسياسيه خنقونا وضيعو الشعب والكل فقد مصداقيته لان اتضح انه لم يكن هدفهم فى يوم من الايام رفعته ابدأ وانما كانت لهم اطماع شخصيه بيحاربو لاخر رمق علشان يوصولو ليها ربنا يحفظ مصر ورغم ده كله لازالت اثق ان مصر كبلد وحضاره ستتنتصر يعنى هزمنا الطغاه مش هنقدر نهزم الفساد !

;كارولين فاروق يقول...

ازيك يا ماما زيزي
والله كأنك توصفين حالتي تماما
أصابني الأكتئاب والغم بسبب مشاهدتي
لبرامج التلفيزيون وقرأه الجرائد
واتمني السفر لأستريح
او ااخذ طياره لجزيره بعيده
واجلس فيها وحدي
ايام وليالي
اتمني ان تكوني بصحه جيده
وفرحانه بوجودك يا ست الحبايب
تحياتي

ظلالي البيضاء يقول...

ماما زيزي ..
أخيراً أطل القمر بوجهه المشرق وإن كانت الأيام قد جعلت له مسحةً من الحزن والألم ..
لكن الفرحة التي في قلبه لن تمحوها مصائب الدهر مهما كثرت وعلا صوتها ..
لو دخلت سيدتي في عالم التدوين لربما وجدت فيه ما تنشدين من الفرحة والحب والسعادة التي نرسمها خطوطاً ملونةً بأقلامنا وإن كانت حقائقها قد تكون بعيدةً عن قلوبنا ..
لكن في هذا العالم أحبةً لن نجدهم في شاشات التلفاز أو بين سطور الجرائد ..
الحمد لله على سلامة حضرتك ..
ويا رب يرفع عننا وعنكم الغمة ياااارب ..
مع التحية الطيبة والاحترام ..

zizi يقول...

خالد العزيز ..اتمنى يا خالد يسمع منك ربنا ويرجعها مصر التي في خاطري وفي فمي ..ياريت يا خالد نفسنا كلنا نرتاح بقى ونعود لأشغالنا واعمالنا وانشغالاتنا اليومية العادية ومانكونش مشغولين على البلد كده انا عمري ماكنت اتخيل ان مصر ممكن تزود عندنا السكر والضغط كده مش زعل منها لكن خوف عليها دي مصر يا عالم عارفين يعني إيه مصر ؟؟؟؟مصر

zizi يقول...

استاذ محمد هنا ياهلا يا هلا ..فعلاً كلنا لازم نتمسك بالأمل ان اللي حاسينه ده من شدة الخوف عليها والقلق على مستقبلها زي ما بننشغل على ولادنا وهم داخلين امتحان صعب يارب يا مصر تكوني مذاكرة كويس وتعرفي الإجابات الصح ..يارب

zizi يقول...

دودوالجميلة ..وحشتيني قوي يا حبيبتي وكأني كنت من أهل الكهف وطلعت هم كانوا تلتميت سنة والا تلتميت يوم ؟؟المهم يا بنتييارب الجاي يكون احلى ومايدوهمش براءة في النقض تبقى مصيبة سودة ..اما اللي حايحكمنا فذنبه على جنبه لأنه لسه ما يعرفش المصريين إذا قاموا من غيبوبتهم بيبقوا عاملين إزاي ..ربنا معانا ان شاء الله ..

zizi يقول...

شموستي المنيرة ..ماهو يا حبيبتي نوم كالنوم وليس بنوم بل هو تخيلات وكوابيس لما يمكن أن يحدث إذا أو إذا ..وربنا يجعل فيها من يصلح فيها ومعلش انا دخلت على المدونات متأخر فلقيتك كتبتي حاجات كتيرة وقفلتي عليها فاعتبري لكي تحيات وسلامات كتيرة لكل بوست فاتني ياست الستات ..

zizi يقول...

شيرين سامي حبوبتي الجميلة ..معلش بقى ماكنتش معاكم لما عملتي الحركات بتاعتك النص كم دي وسبتي مدونتك شوية وفتحتيها تاني إوعي تعملي كده تاني عشان احنا ما نستغناش عنك ..وحشتيني يا جميلة

zizi يقول...

ابني الغالي احمد سعيد..اشكرك على هذه الكلمات التي ارجو أن أكون استحقها والله يعلم أني احمل مثلها لكل أحبائي منكم ..ونحن يا أحمد في إنتظار الصباح الذي يحمل معه إشراقات فجر انتظرناه طويلاً..ندعو الله بكل ما أوتينا من حب لهذا الوطن الجميل بحق ولعل يكون الآتي خير إن شاء الله ..

zizi يقول...

ريماس الغالية..تصدقي يا ريماس انا عمري ما اتحطيت في موقف اختبار لحب مصر زي اللي إحنا فيه الآن..أيوة انا موقنة جوايا إني باحبها وباصحى كل يوم على حبها وبانام على حبها ولما كنت مديرة مدرسة في وقت من الأوقات كنت مخلية النشيد اللي بيطلع عليه الطلبة لفصولهم "يا أغلى إسم في الوجود يامصر "بس الحالة اللي احنا فيها دلوقتي دي عايزة الواحد يدخل في ضمير القاضي وضمير المجلس العسكري وضمير محمد مرسي وضمير احمد شفيق ..عشان نشوف مين اللي ضميرهنقي وبيحب مصر بجد ومفيش في ضميره هوى تاني غير حب مصر طيب ازاي ممكن ندخل في ضمايرهم ..دعواتكم لنا يا كل من تحبون مصرنا ..

zizi يقول...

ابراهيم طيب انت لما رحت لما بعد اللاشيء لقيت إيه هناك ..طمني ّهل هناك شيء ؟؟ماهو ؟؟

zizi يقول...

wessam..مرحباً بك في مدونتي المتواضعة فهي قد اكتست خضاراً بقدومك ..واتمنى ان نرى مصر قد عادت لها شمسها الذهب..ونرى الفساد وقد ارتعدت فرائصه للأبد انه تعالى قريب مجيب الدعاء ..

zizi يقول...

كوكي الجميلة الرقيقة ..بيسعدني وجودك قوي على وجه مدونتي فتملأيها رونقاً وإشراقاً..انتي عارفة يابنتي لما بتسمعي أغنية :فيها حاجة حلوة حاجة حلوة بينا حاجة بتبت جوانا سنة سنة ..شوفي انتي بقى الحاجة الحلوة دي بقى متبتة فينا أد إيه يعني زي الضرس مش بيقولك ده زي خلع الضرس اهو حبها في قلوبنا نحن الكبار متمكن فينا زي ضروسنا وشرايينا واوردتنا ..ياه يا كوكي انا باحب البلد دي قوي وبس ..تحياتي لكي وللأسرة الكريمة

zizi يقول...

محمد الذهبي ابني العزيز ..وحشتني ودايماً فاكراك لأن قناة الفراعين عندنا مش مقصرة أبداً ودايماً توفيق عكاشة "أيا كان اختلاف الآراء حوله "دايماً الراجل بيجيب أحوالكم عشان يحذرنا من النتيجة اللي ممكن نوصلها لو مسكونا الإخوان والله يكون في عونكم وعوننا واشكرك على كلماتك الرقيقة بس أقولك على حاجة بقى في شخصيتي ماتعرفهاش عني انا الحمد لله الحزن بياخد وقته بس معايا ويمشي ما بيسيبش مسحة حزن عشان الدنيا كلها ما نضمنش حانعيش فيها كام لحظة تانية عشان نعيشها في حزن وعلى رأي سعد عبد الوهاب :ياللي بتسأل عن الحياة خدها كده زي ماهيّ..تحياتي لك وللأسرة جميعها ..

مدونة رحلة حياه يقول...

السلام عليكم
مللت المتابعة يا امى
مللت الفساد
مللت الظلم
ولكن يتبقى شعاع النور
لعل فى القادم خيرا يا امى

zizi يقول...

وانا مثلك يا محمد لم يعد هناك شيء يرد في تلك الروح فالأحداث غير المفهومة هي هي والنوايا الغير صادقة هي هي والمتشدقين بالكلام هم هم وأين نحن في كل هذا فليتولانا الله عز وجل ..

مصطفى سيف الدين يقول...

ازيك يا ماما اخبارك ايه يا رب تكوني بخير
معلش ده حال البلد بقى شكل الفترة الانتقالية دي مش هتخلص غير لما تجبلنا كلنا هسهس

رؤى عليوة يقول...

اولا حضرتك وحشتينى

ثانيا

لله الامر من قبل ومن بعد هنعمل اييييييييه
ثورة واتعملت محاكمة وقدمنا الناس للمحاكمه

مش هيكون غير اللى ربنا عايزة
اما الكوابيش فهى مبقتش بس فى المنامات
الحقيقه والواقع فيها اكتررررررر


ربنا يهون

ودمت بخيييييير

نسرين شرباتي "أم سما" يقول...

بعيداً عن كل الحاجات دي
واحشاني أوي يا ست الكل
بجد واحشاني فوق ما تتصوري :)