Powered By Blogger

الثلاثاء، 15 يناير 2013

نوافذ مفتوحة..ليست نوافذ مواربة ..


نوافذ مفتوحة..ليست نوافذ مواربة ..!!

من فضل الله وكرمه أن تكون عودتي للكتابة على صفحات قلبي وعلى أسطر أضلعي من خلال احتفال أدبي رائع وراقي ومليء بالإبداع ..احتفال يريح القلب ويزيح الهم ويعليّ الهمم ويعلي القيم والقمم ..الله يا مصر ..الله يا مصر ..الله يامصر ..والله حبي ليكي مش من فراغ ودايماً بأراهن عليكي وباكسب الرهان حتى ولو لعبت لعبة الرهان دي بيني وبين نفسي ..دايماً انا باقول مصر دي ولادها مش هايفين ولا تافهين وعمرهم ماكانوا هم المقصودين لما المخرجين كانوا يعملوا افلام هابطةويقولوا الجمهور عايز كده ...مين الجمهوراللي عايز كده ..اكيد دول ما يعرفوش الجمهور المصري ولا الشباب المصري ..الشباب المصري الحقيقي تعالوا اتفرجوا عليه هنا ..أيوه هنا على المدونات وعلى صفحات الفيس بوك ..استنوا شوية ..انا عايزة اضبط تعبيري ..الشباب العربي الحقيقي هو ده ..وابقي محدودة الفكر لو قلت الشباب المصري بس..لا والله الشباب العربي كله ..لعلمكم انا عندي في البيت كشكول عاملاه مخصوص عشان اسماء المدونات اللي بادخلها واللي مش قادرة اعدها من كترتها ..واللي كل ما ادخل واحدة ابقى عايزة اقولكم بعلو صوتي تعالوا حصلوني فيه هنا وجبة دسمة الحقوا منها حتة واغرفوا منها طبق ..بل اطباق شهية ولذيذة ..ولاانسى اسماء آثرت على نفسها ان تسعدنا حتى ولو سهرت وكدّت وجمعت من هنا وهناك وعلى رأسهم بالطبع الأستاذ محمد الجرايحي ..اما بناتي العزيزات كلهن فلا أنسى منهن لبنى نور وإيثار نور ونهى صالح ..وغيرهن كثيرات أخشى أن أنسى إحد اهن فأخرج عن حدود اللياقة وبالطبع كذا جميع أولادي الذين يشاركون بجهدهم في أعمال كثيرة ..ما أروعها تلك المطبوعات وما أروعها تلك المشاركات في اعمال جماعية قيمة بدأت بأبجدية إبداع عفوي ..وبطاقة هوية ..وقد يكون فاتتني أعمال جماعية أخرى "ليتكم تدلوني عليها "..ثم كانت احتفالية الأمس التي سنستكمل احتفالنا بها في عرس معرض الكتاب ..وبالطبع اقصد بهامجموعة "نوافذ مواربة "..وصدقوني ان قلت أنني حين تصفحت النسخة الإلكترونية منها منذ دقائق فوجئت بكم الإبداع المتقن وفوجئت بكم الأقلام العربية المشاركة وصدقوني لاأملك الآن وأنا بين ايديكم على صفحات مدونتي المتواضعة التي تزداد فخراً وبشراً أن تحمل سيرتكم العطرة مابين أسطرها..لاأملك إلا أن أنحني إجلالاً واحتراماً لكل يد ساهمت في خروج هذا المشروع الثقافي وأن انحني لكل شباب الأمة العربية الذي يثبت مع كل بزوغ فجر أن الأمة العربية بخير وستظل بخير ..طالما هناك شباب مثلكم يا أولادي الأعزاء ..دمتم لنا ذخراً وفخراً وميراثاً نفخر به على مر الزمان ..

هناك 22 تعليقًا:

مصطفى سيف الدين يقول...

اكتر حاجة مفرحاني الفترة الأخيرة ان النوافذ ممكن تلحق المعرض
لي الشرف اني مشترك في الكتاب الخرافي ده
و باشكر الاستاذة لبنى و كل الفريق اللي ما بخلش لا وقت و لا جهد و لا مال علشان تجربة الابجدية و بعدها النوافذ تنجح
تحياتي ليكي يا ماما و يا رب تكوني بخير

ليلى الصباحى.. lolocat يقول...

السلام عليكم

الجميل هو قلبك الكبير
قلب الام الطيبة والاخت الرائعة وابنة مصر الوفية
الجميل احساسك وشعورك اللى اشاركك فيه واؤيدك فى كل حرف قلتيه عن مصر وولاد مصر

ده مين ده اللى يقدر مايحباهاش او يستغنى عن ترابها الطاهر ؟!!!!!


انت اللى جميلة القلب والروح ياغالية
وشاكرة لك على كلماتك الرقيقة فى مدونتى وربنا يزيدك مودة ووفاء لكل احبابك يارب

وكل سنة وانت وشعب مصر وكل الاصدقاء بخير وسلام وامان وعزة

سلمت اناملك وتحياتى لك بحجم السماء

سواح في ملك اللــــــــــــــــــه- يقول...

جيت اقوللك حمد الله علي السلامة

غُفرَانْ يقول...

صباح الخير زيزي ~
صراحة ما تابعت أي فعاليات بس كلامك عنها حمسني اروح القي نظرة :")
و أكيد لسه في الأمة العربية ناس طيبة ذات فكر راقي
و روح سامية و أهداف نبيلة الله ييسر لهم الي فيه الخير
و ينور دربهم و يكون معهم :")
دمتِ بسعادة .

candy يقول...

ربنا يخليكى دايما المشجع والمحفز والناصح ، و روح أمومية تعطر الجميع بحضورها.
^_^

ابراهيم رزق يقول...

zizi العزيزة الذيذه

حمد الله على السلامة
نوافذ بلوجر منورة

اما عن الكتاب قبأذن الله اقراه

تحياتى

;كارولين فاروق يقول...

حمد لله علي السلامه
ايه الغيبه دي كلها
طبعا الاسماء اللي حضرتك
ذكرتيها ليها ثقلها
ومكانتها الغاليه
لدي الجميع
اما عن الكتب الجماعيه
فانا اهنئ كل من شاركوا
حمد لله ع السلامه
تحياتي وتقديري

ريهام المرشدي يقول...

السلام عليكم و رحمة الله و بركاته
لا أستطيع أن أصف لكِ مدى سعادتي بعودة حضرتك للتدوين دا أولا ، و عندما دخلت و قرأت كلماتك الأكثر من رائعة تراقص قلبي فرحا، و أحب أن أحيي هنا الأسرة التدويبنية الرائعة التي سبقتني بالتعليق :) ... فهكذا أستشعرهم فعلا في أي مدونة أذهب إليها و من خلال تعليقاتهم تأكد لي هذا الشعور .
تحياتي لكم جميعا و لأقلامكم المحترمة و أخص بالذكر القديرة ليلى صباحى و القدير محمد الجرايحي ... حمد الله ع السلامة و أتمنى لك السعادة و الصحة ياااا رب ... و متغيبيش علينا كتير كدا يا ريت :) .

m.hallawa يقول...

مساء الفل والياسمين والروز

أن شاء الله سأتواصل معكم من مصر الحبيبة عما قريب
أنا ليسة راجع بس واحشيتني كثيرا !!!!

تحياتي وأحترامي

Lobna Ahmed Nour يقول...

الحمد لله على سلامة حضرتك
مش عارفة أعلق على التدوينة
لكن دعمك بيعني لنا وليا أنا شخصيا كتير

محمود جمعه يقول...

حمد لله على السلامة
وكل سنة وحضرتك طيبة وبخير يارب :)

zizi يقول...

وانا برضه اكتر حاجة مفرحاني انها تظهر في المعرض وتكون انت مشارك فيها ..يا رب اشوفك يا مصطفى ان شاء الله ..

zizi يقول...

ليلى الجميلة الرقيقة ..هو ممكن الواحد يحب حد من اول طلة ..لكن انا باحبك من اول دخول ليا على مدونتك ..حسيت اد ايه انتي جميلة ورقيقة ..فعلاً انا باحب مصر قوي وياسلام لما يغنوا عنها في الأوبرا اول واحدة بتغني بكل حماس وحب انا ..ولعلمك لما كنت مديرة مدرسة في وقت من الأوقات كنت باخلي النشيد اللي بيمشوا الصبح عليه "يا أحلى إسم في الوجود يا مصر "ولغاية الآن النشيد ده بيحرك جوايا حاجات كتير قوي وبيخليني عايزة اعيط عشان مصر ما تستاهلش كل التجريح والتشويه ده كله ..المهم تحياتي على البعد واتمنى اشوفك بجد ..

zizi يقول...

خالد وانا جيت اقولك الله يسلمك واول واحد احب اشوفه يوم المعرض انت ..

zizi يقول...

غفران الجميلة ..اولاً منورة مدونتي ثانياً :لازم تروحي وتتابعي كل الأقلام الرائعة اللي موجودة ويكون لي عظيم الشرف لو شفتك ..

zizi يقول...

شمعة المدونات الرقيقة كاندي ..قوليلي ارد على الرقة دي كلها ازاي وانا قلبي دايب فيكي من يوم ما شفتك وكأن قلبي قدامك اتحول لشمعة هو كمان ..تحياتي ليكي ولبابا ..

zizi يقول...

برهوم حاكينا ..ازيك يا هيما والله ان انا باقرا كل الحلويات بتاعتك وباضحك على قفشاتك الرائعة والمتربصة بس بأكسل اعلق فمعلش اعذرني وكل سنة وانت طيب والأسرة الكريمة

zizi يقول...

كوكي الجميلة ..اشكرك واشكر كل آل الفاروق ..وان شاء الله ماأطولش الغيبة تاني ..واتمنى اشوفك في المعرض

zizi يقول...

ريهام الجميلة الرقيقة ..اسعدتيني بردك ونفسي اشوفك في المعرض تشجعيني ماليش دعوة هه..

zizi يقول...

اخي العزيز محمد ..المدونة نورت بقدومك وكان نفسي قوي اشوفك لما جيت مصر لكن حاعتبره وعد اني اشوفك المرة الجاية ..تحياتي

zizi يقول...

لبنى الجميلة الرقيقة ..انا سعيدة بيكي قوي لإنك انسانة بتحاول تخرج كل ما فيها من طاقات ابداعية ومبسوطة اكتر لأنك اضفيتي من طاقتك على طاقة إيثار الرقيقة فبقيتوا زي فرعين الشمعدان اللي بيضيء للجميع طريق الإنطلاق نحو عوالم رحبة من الأدب ..واشوفكم في المعرض ان شاء الله

zizi يقول...

أخي الفاضل محمود جمعة ..اشكرك على اهتمامك وانا باسعد جداً بشعرك الجميل بيسببلي حالة من الإحساس بالإنتعاش كل ما أقراه ..اشكرك بعمق ..