Powered By Blogger

الأحد، 16 أكتوبر 2011

التعليم في مصر

التعليم في مصر
عندما كلفني ابني العزيز محمد متولي
بالتطرق لهذا الملف الشائك ..فكرت
كثيرا..هل ما سوف اكتبه سيساهم ولو بقطرة في حل هذه المشكلة ..
وهل حماستي لوحدها كافية لنقل
امنياتنا جميعاً في تعليم أفضل
من خانة التمني ..إلى حيز التنفيذ ..
ولكني بعدما فكرت قلت :على المرء أن يسعى وليس عليه إدراك النجاح..
ومن هذا المنطلق ومن حبي لبلدي مصر 

التي اتمنى أن اراها قبل وفاتي 

كما يليق بها من مكانة بين الدول ..

من هذا المنطلق ابدأ 
بسم الله الرحمن الرحيم 
لا استطيع ان افصل منظومة التعليم 
في مصر بأي حالٍ من الأحوال 
عن منظومة محو الأمية 
فالمنظومتان متكاملتان مثلما تتكامل
اعضاء الجسد الواحد فلو مرض عضو تتداعى له سائر الأعضاء بالسهر والحمى ..
اولاً :تقسيمة التعليم الأساسي:
ينقسم التعليم الأساسي إلى مرحلتين :
المرحلة الأولى : المرحلة الإبتدائية
وهي تتكون من ست سنوات دراسية
ولا يقبل التلاميذ اقل من ست سنوات عمرية
ولو بيوم ..وبالتالي يضطر الآباء
أمام هذا القرار إلى اتخاذ حل من ثلاث :1- لو كان متيسر الحال يقدم لأولاده في مدارس خاصة تقبل التلميذ  من سن حوالي خمس سنين ونصف..
2- لو كان ليس عنده ضمير بيتعرف على اشخاص ليس عندهم ضمير ويزوّر شهادة ميلاد ابنه ليصبح تاريخ ميلاده أواخر سبتمبرأو أول اكتوبر..ياسلام ..
ثم بعد ما يستلم ملفه وهو داخل الثانوي ياخدوا الشهادة المزورة ويحطوا الشهادة السليمة ..أو من الأول وهو لسه مولود بيدفعوا رشوة لموظف الصحة ليكتب المولود في تاريخ
مناسب للسن المناسب لدخول المدرسة ..
3- الناس البسطاء جداً وعادة في الأرياف لما ما بيقدروش يدخلوا ولادهم على ست سنين الا شوية..وبيفوت عليهم الشهور الأهالي بيكسلوا يدخلوا ولادهم
المدرسةوبيلاقوا قعدتهم في الغيط او شغلهم في اي بقالة او ورشة احسن وأربح..
×دي اول نقطة اتكلمنا فيها ..ليه طالما ممكن الطفل بيدخل المدرسة من خمس سنين ونصف في المدارس الخاصة ليه القرار ده ما يتعممش على الكل خاصة وحكومة والا الفلوس بتخلي مخ الولاد في المدارس الخاصة اكثر ادراكاً منه في المدارس الحكومية ..
________________
×ما زلنا في المرحلة الأولى من التعليم الأساسي ..مرحلة التعليم الإبتدائي ..
التلميذ بيدخل إما بيكون عارف بعض المعلومات من مرحلة الكي جي ودي برضه بتبقى للي دخلوا مدارس خاصة
أما الغلابة "وما أكثرهم "اللي بيدخلوا مدارس حكوميةفدول أول مرة
يعرفوا يعني ايه قلم وكراسة وسبورة
وبكده خلقنا منذ الصغر نوعين من البشر ..نوع عرف يكتب ويقرا لأنه اغنى من النوع التاني وبكده مابقاش فرق الإدراك ست شهور فقط ....
ده بقى سنتين دراسيتين بحالهم
كي جي ون ..وكي جي تو

×يبقى لازم نعمل في المدارس الحكومية العادية جداً نظام الحضانة الملحقة بالمدرسة ويبقى الأطفال يدخلوا من ثلاث سنوات ونصف..نفس سن دخول بتوع المدارس الخاصة ..

يبقى كده حايكون فيه عدالة بين الغني والفقير في أبسط الحقوق حق التعليم 

×فيه هنا حاجة حاتتحل معانا واحنا ماشيين الحضانات دي مش محتاجة مدرسات يبقى كدة حلينا جزء كبير من مشكلة البطالة ..
×المناهج لازم تكون بسيطة وتكون موحدة بين المدارس الخاصة ومدارس الحكومة..
× لازم الطفل في مرحلة الحضانة يتعلم مسكة القلم الصح "ده على اعتبار ان المدرسة نفسها عارفة تمسكه "..ولازم يعرف الحروف الأبجدية العربي ...العربي ...العربي...
ويجب أن يعرف الأرقام العربية
أو المتفق عليهاحتى الآن:
واحد ..اتنين.. لأن طبعاً الكمبيوتر للأسف مش عليه الأرقام العربية وعشان كده انا مش عارفة اكتبهالكم ..
ويعرف الحاجات الصح في تعاملاته مع الناس والحاجات الغلط
ويعرف ان احنا لازم نحب كل كل الناس
ويعرف ان احنا لازم لازم نحط الزبالة في صفيحة الزبالة وما نرميش أي حاجة في الشارع أو في الحوش
ومانعملش حصص دين لكن نعمل حصص اخلاق
اوعوا نعمل حصص دين وننزل المسيحيين في الحوش او في المكتبة او تحت بير السلم ليه عشان الأولاد التانية الأحسن منهم المسلمين قاعدين محترمين في الفصل ياخدوا حاجة اسمها حصة دين واحنايامسيحيين يا نلعب يا ييجي اي مدرس فاضي يقعد بينا"مدرس غير متخصص المهم يكون اسمه في شهادة الميلاد بطرس او جرجس او ميري او جانيت مش مشكلة ماهي دي اصلها حصة دين مش مهم قوي يعني مين اللي يديها "
باقول وأؤكد :اوعوا نعمل في الحضانات حصص دين اياً كانت هذه الحضانات حكومة والا خاص
اوعوا اوعوا اوعوا
اعملوا حصص اخلاق لكن ماتعملوش حصص دين ..خلي الولاد كلهم سوا من أول اليوم لآخره واوعوا المدرس والا المدرسة سواء مسلم والا مسيحي ياخد حد من الولاد في  حضنه على اساس الدين ولا تتقال الكلمة دي ولا حتى في بيانات الأطفال
__________________
الولاد دلوقتي على مستوى الجمهورية في مدنها ونجوعها وكفورها وكومباونداتها..كلهم كلهم خدوا نفس القدر من التعليم في  المدارس الحكومية والخاصة ؟؟خدوا عربي منهج بسيط جداً يادوبك يعرفوا الحروف الأبجدية ويكتبوها بخط جميل واكرر بخط جميل ويعرفوا المفرد من المشبك بأبسط الطرق ..وخدوا الأرقام من واحد لعشرة ومضاعفاتهالحد مية كفاية عليهم كده ويعرفوا يعني ايه جمع وطرح بس خلاص
وخدوا منهج جميل في الأخلاق واتدربوا عليه عملي يعني في الفصل والحوش والفسحة والرحلة والشارع ومفيش مانع ان احنا نعمل هدايا صغيرة جداً ولو قلم رصاص والا مصاصة للطفل اللي يعمل حاجة من الأخلاق اللي احنا علمناها له وحتى لو عمل حاجة حلوة في البيت مفروض مامته توصلها للمدرسة عشان يثاب عليها والعكس صحيح ..
يبقى احنا كده ضربنا عصفورين بحجر واحد ..طبقنا منهج الأخلاق ..وربطنا البيت بالمدرسة
وبالطبع في الحضانة مفيش حاجة اسمها امتحان ومفيش حاجة اسمها نتيجة آخر السنة لكن فيه حاجة اسمها تقدير للمدرس أو المدرسةعلى مجهودها مع الأطفال ونعمل حفلة للمدرسين عشان الأطفال يعرفوا قيمة المدرس بتاعهم وما يتلمش من الأطفال فلوس عشان هذه الحفلة ولكن بتكون من ميزانية المدرسة التي يجب أن يضاف اليها نسبة معينة لهذه الإحتفالات ..
حا نسأل طيب وازاي نعرف ان المدرس كان أمين مع الطفل ..دي بتكون عن طريق استمارة ابداء رأي في المدن او بمعنى اصح عند اولياء الأمور المتعلمين هم بيملوها في نهاية السنة مكتوب فيها مجموعة اسئلة مثال :1- هل ابنك الآن يعرف الحروف من كذا لكذا ؟
2- هل ابنك يمسك القلم مضبوط ؟
3-0 هل ابنك يعرف يعد ويكتب من كذا لكذا ؟
4- هل ابنك تعلم من دروس الأخلاق كذا وكذا ؟
5- ماهي السلبيات التي رأيتها في المعلم طوال العام حتى يحسن من نفسه ؟
6-ماهي الإيجابيات التي وجدتها في هذا المعلم حتى نحث غيره عليها ؟
7- كيف أثر التعليم هذا العام على ابنك؟ماهي المكتسبات التي اخذها من التعليم هذا العام ؟
هذه بعض من افكاري قد ترون انتم اسئلة اعمق منها او افيد ولكني اوردها لمجرد المثال
كما اني افكر ان يكون هذا الإستبيان مع ولي الأمر من أول العام حتى يكون اولاً بأول متابع لما يجدّ على ابنه ويجمعه كله ليقدمه في نهاية العام أي اننا نقلنا الحسبة من اختبار للطالب إلى تقدير للمعلم واعيدها ثانية:تقدير للمعلم ..
فأنا مع المعلم ولست ضده ..ويكفي انه يأخذ قطعة من فلذات أكبادنا ليجعل منه أمل الأمة الذي نرجوه ولو بعد عشرون عاماً..
ولن ننس بالطبع دور الموجه ولكن لن يكون موجه واحد بل هي لجنة من التعليم الإبتدائي بالإدارةليكون رأيها محايد وتدلي هذه اللجنة برأيها في عملية تقييم وتقويم للمدرس ثم تضع التقرير والتقدير المناسب .."ملحوظة يجب بالطبع ان تتغير استمارات التقرير السري ولا يصبح سرياً بل يصبح مكشوفاً للمعلم ويعرف لماذا هو نقص في هذه النقطة من التقرير ولماذا أُعطي الدرجة النهائية في نقطة أخري"ثم نضع رأي ولي الأمر في ملفه مع تقرير اللجنةحتى يؤخذ به بعد ذلك في أي ترقية أونقل ..
لا تخافوا فانا لم انسَ هؤلاء الأطفال الذين في بيئات 
لم تسمح الظروف بتعلم الأب أو الأم ..
في هذه الحالة ستكون أيضاً هناك لجنة من التعليم الإبتدائي من الإدارة
واقول لجنة وليس فرد وستذهب هذه اللجنة شهريا للإطمئنان على المحتوى العلمي والأخلاقي للأطفال..وعلى هذا الأساس يتم تقدير المدرس أو لفت نظره للأفضل ..ويكون التقرير السنوي للمدرس متناسباً مع ما قدمه لأطفاله خلال العام الدراسي..وهنا سيكون رأي اللجنة هو الرأي الذي يؤخذ به مع تغيير صورة التقرير السري كما قلت وتغيير نقاطه حسب الدور الجديد للمعلم وبالطبع لن يعود سرياً ..
ملحوظة مهمة جداً جداً جداً :
-----------------------------
لابد ان تتغير صيغة التقرير السنوي للمعلم من مرحلة لأخرى حسب الأهداف المرجو تحقيقها في هذه المرحلة فلا يصح أن يقيم معلم مرحلة الحضانة بنفس استمارة التقييم لمدرس المرحلة الإبتدائية ..بنفس استمارة التقييم للمرحلة الإعدادية ..بنفس استمارة التقييم للمرحلة الثانوية ..
بل والأدهى من ذلك بنفس استمارة تقييم الشخص الإداري ..كلهم كلهم نفس الإستمارة..كيف هذا؟كيف  تكون نقاط التقييم هي هي رغم أنه بالتأكيد أن  كل شخص من هؤلاء جميعاًيجب أن يحقق اهدافاً في عمله مختلفة عن الآخرين في المواقع المختلفة من العمل ..
ملحوظة مهمة جداً:
1- يجب ان تكون كليات التربيةللتعليم الأساسي وكليات التربية العادية وكلية البنات تربوي لها اختبارات نفسية ممنهجة على ايدي متخصصين ويكون لها استمارات خاصة..ويكون فيها كشف هيئة بالضبط زي اللي بيتعمل في كليات الشرطة والحربية عشان مش أي واحد يستهون بالمدرس ولا المدرس نفسه يستهون بنفسه ..وليه ما يتعملش للطلبة مساكن يستلموها بعد مايتخرجوا بكام سنة ويدفعوا لها اقساط بسيطة كل شهر زي ما بيتعمل مع طلبة الشرطة وليه وزارة التربية ماتدعمش الموضوع ده وتعمله من خدمات النقابة لأعضائها اللي لازم يتعمل لهم كارنيهات نقابة من أول يوم دخولهم الكليات التربوية ويدفعوا اشتراك شهري او سنوي مع مصروفات الدراسة ..
2- لايسمح لأي واحد يشتغل مدرس إلا اللي متخرج من كليات تربوية أو يتعمل سنة دراسات تربوية متخصصة لأي حد ماعاهوش مؤهل تربوي لازم ياخده قبل ما يتعين في مدرسة خاصة أو حكومة ..
3- يجب أن يتم تعيين خريجي كليات التربية او من معه مؤهل تربوي فوراً مثلما كان يحدث في الماضي فنحن كنا نتخرج ونتعين في نفس الشهر"أمر تكليف"ولا يعين المؤهلات الأخرى سواء في التعليم الحكومي أو الخاص ويترك التربويين ..كيف يحدث هذا فهموني يا أهل الفهم ؟ولا يسمح لأي مدرس بالإعارة او التعاقد إلا بعد مرور خمس سنوات على تخرجه على الأقل ويسمح له بالتعاقد مدة لا تزيد عن ثمان سنوات وإذا زاد عن ذلك يفصل من الوزارة ومن النقابة اكرر من الوزارة ومن النقابة..وبالنسبة للإعارة يسمح له بالإعارة مرتين طيلة مدة تعيينه وحتى خروجه للمعاش ولاتقل فترة الإعارة الأولى عن الثانية عن عشر سنوات من رجوعه من الإعارة الأولى مع استيفاء باقي شروط الإعارة   ..ارجوكم يجب تفعيل هذاحتى لا يترك الحبل على الغارب..
4- يجب أن يأخذ كل المدرسين..كلهم 
دورة شهرين قبل التعيين في قواعد الإملاء والخط العربي وتكون هي المنفذ للتعيين ويقوم عليها خبراء في اللغة والخط..لو سمحتم لو سمحتم لابد من هذه الدورات ما دمنا نبتغي الأفضل ..لا نريد خطاً كوفياً ولا اساتذة في الخط ولكن نريد خطاً يميز بين الصادوالطاء وهذه لها سنة والأخرى ليس لها سنة والهمزات وما ادراكم ما الهمزات والزين والذال ...إلخ إلخ
5-لابد ان يكون كل من يعمل بالتدريس عضو في نقابة المهن التعليمية ويجب أن يفعلّ دور النقابة في حالة قيام المعلم بأي عمل منافٍ لكونه معلماً..6-6..يجب أن تعالج الثغرات الموجودة حالياً والتي يمكن علاجها فوراً ولا ننتظر لجان ووزارات انتقالية واستكشافية وتسييرية..فكلما اسرعنا كانت  النتائج أقرب إن شاء الله

والآن نكون قد انتهينا من مرحلة الحضانةوما حولها ولنا لقاءات أخرى مع ما يجول بخاطري في مراحل التعليم الأخرى ..برجاء كل من له قريب أو قريبة معلم أو معلمة برجاء ان يدعوه ليقرأهذا الطرح فنحن جميعاً نعمل من أجل الأفضل لمصر وهذه مجرد افتراضات من وحي ما شاهدته لمدة ثلاثون عاماً أو أكثر في مواقع كثيرة هنا وفي السعودية ومن دراستي التربوية وقراءاتي الخاصةوياريت من أول المعلم وحتى المدير أو المديرة والموجه أو الموجهة وياليتنا نأنس برأيك يا أستاذنا الفاضل يامن تختفي وراء قوقعتك وأنا أعلم تماماً أن لديك الكثيرفلتنزل معي إلى الساحة ولا تتركني أجدف وحدي ..ايوه انت بالضبط انت يا استاذي الفاضل محمد الجرايحي..فلتتقدم .. 
تحياتي وشكري للجميع ولكل من اهدى إليّ رأياً ينفعنا  

هناك 15 تعليقًا:

ابراهيم رزق يقول...

zizi العزيزة الذيذة

طبعا يجب ان يتقدم استاذ محمد الجرايحى و يدلى برايه

و الله تنفعى تكونى وزيرة للتربية و التعليم
لكى يتم تنفيذ هذه الخطة يجب ان ننتبه الى
الغاء المجاملات فى التقرير
توفير فى الميزانية و عدم صرف مليم الا فى موضعه
تفعيل النشاطات الفنية لانها من تكشف المواهب و تفرز الطلبة الموهوبين
الخط مهم جدا عشان محدش يكتب نكش فراخ زى حالاتى

تحياتى و تقديرى و حبى

Ramy يقول...

الطرح رائع جداً بجد من حضرتك

أنا خريج
كلية تربية نوعية تكنولوجيا تعليم

يعنى مش مدرس بالمعنى المعروف

انا اكتر اخصائى تكنولوجيا

او التعليم عن بُعد عن طريق الأنترنت

مشروع فاشل جداً جداً جداً من وزارة التربية و التعليم

علشان كدة انا واخد اجازة بدون مرتب

و بشتغل فى السياحة

يمكن كان فى مرة من المرات فى الكلية الدكتور كان بيشوف أفكارنا لتطوير التعليم

أنا يمكن اتكلم عن التعليم الثانوى بكل اناعه العام و الصنايع و الزراعة و التجارة و سياحة و فنادق

أنا كان من أفكارى ان كل ثانوى من دول هو اللى يكون البوابة للكلية اللى تُخصة

مع ترتيب المواد الدراسية و أعادة صياغتها علشان نفع كده

ليه لأن بقى أن اى حد يدخل اى ثانوى غير العام يصبح فاشل فى نظر المجتمع

شيىء مُقزز الصراحة

طبعاً انا اتكلمت فى المناقشة بتوسع بس مش عاوز اصدعكم (:

شكراً لحضرتك جداً

(:

مدونة رحلة حياه يقول...

السلام عليكم
امى
اشكرك بداية على تقبلك القيام بالواجب
واحييك على طرحك الرائع والاسلوب الذى اتبعتيه
على ان اختلافى معك فى نقطة واحدة
ينبغى ان تكون هناك حصص تعلم الاخلاق
بجانب حصص الدين
فلابد من توافر معلمين للدين الاسلامى ومثلهم للمسيحى
فتعلم الدين الصحيح هو الضمانة الاساسية للحفاظ على هذا الوطن
طرحك رائع امى
انتظر باقى الخطوات
دومتى رائعة

Unknown يقول...

سيدتى الكريمة: زيزى
السلام عليكم ورحمة الله وبركاته
أوجاع التعليم كثيرة وتزداد يوماً بعد يوم وفى القلب غصة لأنى أرى هذه الأوجاع وأعايشها يومياً وأصطدم بنماذج من عبدة الروتين وتنفيذ التعليمات حتى لوكانت على الورق......آآآآآه يابلد

zizi يقول...

ابراهيم رزق كلامك فيه كتير من الصحة بس لسه في الحلقات الجاية وبرضه حكاية التقارير ما انا باقول مش عايزينها سرية عايزينها تكون معروفة هو خد هنا قليل ليه وخد هنا كتير ليه اما الميزانيات دي فلسه عليها كلام بالتفصيل ..تحياتي وشكري وان شاء الله نواصل مع كل مرحلة اهم مافيها من سلبيات وكيفية علاجها

سواح في ملك اللــــــــــــــــــه- يقول...

التعليم

للاسف اصبح كالروتين

الاب عايز يدخل ابنه المدرسه

وبيديله دروس خصوصيه عشان ينجح فقط

مش مهم يكون فاهم والا لا

ولا بيعرف يكتب بدون اخطاء املائية والا لا

والكارثة التانية اللي انا مسميها

ثانوية عامية

كل اب عايز ابنه يجيب مجموع

ويدخله احدي كليات القمة

وخلاص دون موهبة او فهم

تحيتي سيدتي

zizi يقول...

رامي انا عجبني قوي مناقشتك وعايزة منها كتير ادخل تاني وتالت كل ما يخطر على بالك حاجة انا في انتظار ارائكالجميلة وعلى فكرة انا كمان ليا مع التعليم الفني ده شوية امال يارب يارامي نقدر نعمل حاجةيارب ..ياللاروح فكر شوية واعصر مخك يارامي ..تحياتي وشكري

zizi يقول...

ابني العزيز محمد متولي ..كما تناقشنا على الفيسبوك منذ قليل بالنسبة لموضوع حصص الدين انا باتكلم عن مرحلة الحضانة دلوقتي وباتكلم عن المدرسة مش المنزل ..يعني انا باقول ان الأطفال في هذه المرحلة مش عايزاهم يحسوا ان حصة الدين بتفرقهم يقوم يبقى عندهم حاجة جواهم انهم مختلفين لا انا عايزاهم مافيش حاجة تفرقهم طول اليوم الدراسي ..لكن في البيت طبعاً حافترض واحد عايز يحفظ ابنه والا بنته حاجة بسيطة من القرآن وماله دي حاجة تخصهم كأسرة بس برضه توغلوا فيه برفق عشان يعيشوا طفولتهم ..وخلي بالك احنا بنتكلم عن البلد كلها يعني قراها ومدنها يعني اهتمامات طفل المدينة بعد المدرسة مختلفة عن اهتمامات طفل القرية..
لكن طبعا ً في ابتدائي حا يبتدي الدين ياخد شكل تاني وبرضه حا اتطرق ليه في وقته ..واشكرك وانا سعيدة ان طرحي عجبكم والي اللقاء في الباقي

zizi يقول...

استاذ محمد الجرايحي كلامك اوجعني لأني عشته وربما مازلت اعيش توابعه واسمح لي ان اشاركك همومك على الفيس بوك ان سمحت لي بذلك وتأكد اننا نتكلم لغة واحدة من الألم ..لك تحياتي وشكري

zizi يقول...

آه يا خالد ..انت جبتها من آخرها ..التعليم بقى شو مابقاش تعليم وياسلام على المدارس الخاصة وما يجرى فيها ..مشاريع استثمارية هائلة ..وكثير كثير وكله بأوانه ..تحياتي وشكري

غير معرف يقول...

صباح الكل يا ست الكل

بالتأكيد التعليم سواء في مصر أو بقية الدول العربية محتاج لوقفة جادة من كل المسؤولين والمعلمين على حد سواء فهناك ثغرات كثيرة في هيكل التعليم العربي عبرتي أنت عن بعضها وخصوصاً في المرحلة التأهيلية والتي تسمى في السعودية المرحلة التمهيدية والتي يتأسس فيها الطفل على بعض الأخلاقيات ومعلومات بسيطة في مجال اللغة والحساب لتليها بعد ذلك مرحلة الروضة و كان الحال هنا في السعودية شبيه تماماً لمصر فمرحلة التمهيدي وما تليها قبل الإبتدائية هي أختيارية ولكن في هذا العام سنت وزارة التربية والتعليم قرار بمنع دخول أي طفل للإبتدائية دون أن يمر بالمرحلة التمهيدية حتى يكون مهيأ للدراسة بدرجة أولى وأيضاً حتى يتساوى الجميع في المستوى التعليمي ولا تكون هناك فروقات واضحة وهو ما لمسناه خلال السنوات الماضية ....

الأفكار والعقليات موجودة ولكن للأسف دائماً ما نصطدم بصعوبة التفيذ بسبب البيروقراطية والمركزية التي أنهكتنا جداً في جميع الحقول وليس التعليم فقط وأتمنى من الله أن تظهر منظومة تعليم جديدة ترقى بكل وطننا العربي ...

موضوع حساس وأفكار جميلة منك يا مربية وأتمنى من قلبي أن تجد لها صدى وتبصر النور ...

تحياتي وإحترامي

zizi يقول...

ريبال ..هو اكيد المعاناة واحدة في كل الدول العربية بس يا ريت المسئولين عن التعليم يكملوا على بعض حتى لكن دا كل واحد ييجي يهدم القديم ويبني من الأول وكانه حمام وحا يغير السيراميك بتاعه ..اشكرك على مشاركتك وعايزة المزيد ...

zizi يقول...

استاذي الفاضل استاذ فاروق للأسف رسالتك لم تنزل هنا رغم اني لمحتها على ياهو ميل عموماً من اللي قريته فيها احب اقول لحضرتك ان احنا المفروض نرجع نفعل اسم الوزارة تربية وتعليم احنا للأسف لا شايفين تربية ولا لاقيين تعليم ..اما باقي النقاط التي اشرت سيادتك لها فلسه لما ييجي دورها في الحديث عن المراحل الأخرى في التعليم ...تحياتي وشكري

نسرين شرباتي "أم سما" يقول...

ماما زيزي
كلامك جاي ع الوجع
بجد التعليم في بلادنا بحاجة لضبط كبير
زي عندنا
وإن كنت بحس إن التعليم هنا أقوى
أو يمكن علشان مدرستي كانت قوية جداً
ويمكن علشان المعلمات اللي عاصرتهم كانوا كلهن الحمد لله عندهن ضمير :)
مش عارفة بالضبط
بالنسبة للمرحلة اللي قبل الابتدائية عندنا هنا صف اسمه "تمهيدي" ده قبل الصف الأول بالزبط بيكون في كل المدارس تقريباً الحكومة والخاصة،، ده زي كي جي ون تو،، والمدارس الخاصة "ومش كلها" بيكون فيها كي جي ون وكي جي تو
بس مش إلزامية،، لكن التمهيدي تقريباً شبه إلزامي،، مفيش حد مش بيدخله،، وليهم كتب ومواد وكل حاجة،،، وامتحانات وأوراق عمل،،
واللي بيدخل الأول على طول بيتوه فعلاً أو شبه ممنوع أصلاً عندنا،، مش عارفة بالزبط،، بس أصلاً في منهاج صف أول بيدخلوا على الدروس على طول،، يعني مفيش تعريف للأحرف،، لأن ده بيكون بشكل مكثف في التمهيدي
يمكن التعليم عندنا أقوى والله معرف
،،،،،،،،،،،،
يمكن أطلت مش عارفة
تحياتي لاهتمامك بجيل المستقبل :)

zizi يقول...

نسرينا الجميلة ..لا يابنتي انتي ماطولتيش بالعكس انا عايزة كل العرب يقفوا معانا ويمدونا بتجاربهم..عشان الفايدة تعم وفعلاًزي ما انتي بتقولي المدارس فعلاً ادارة يعني انتي بتقولي على مدرستك كانت شديدة يعني مستواها عالي في التعليم ..رغم طبعاً ان المناهج كلها واحدة لكن بتفرق من مدرسة للتانية حسب المدير او المديرة وده اللي عايزين برضه ناخد بالنا منه ..تحياتي وشكري