Powered By Blogger

السبت، 9 فبراير 2013


نبتدي منين الحكاية ؟؟؟


تك..تك..تك..حبايبي يا حلوين هاهي مامتكم زيزي يا عزيزي جاتلكم تاني وجايبة معاها حكايات كتييييييييييييييييييير..من كل بلد حكاية ومن كل مكان حدوتة ..ولكل شخصية نادرة ..ايه رأيكم ماتيجوا بينا نقرا سوا الحواديت ومعلش المرادي مفيش صور لكن اوعدكم بشوية صور حلوين في المرات القادمة وطبعاً اللي مستعجل يدخل على الفيس بوك حايلاقي مبتغاه ..
بصوا بقى يا حبايبي يا حلوين ..المعرض السنادي رغم الأحداث الصعبة اللي بتمر بها البلد بس كان فيه انتاج غزير بشكل ..والله انا مش عارفة كمية الكتب دي اتكتبت ازاي ومين اللي حايقرا ومين يسمع ومين يفهم..بس عموماً لولا اختلاف الأذواق لبارت السلع ..دور النشر كلها بتتنافس منافسة شريفة في اجتذاب القاريءوالناس لولا الحالة الإقتصادية التي لاتخفى على أحد لكانوا اقبلوا اكثر واكثر..ولكن كان الله في عون الجميع ..وبالطبع رغيف العيش ودروس الأولاد اهم بكثير من كتاب يُقرأ..

المهم اقيم المعرض وكان نصيبي في حفلات التوقيع يوم الأربعاء 30 يناير وكان يوم زاخم بالحفلات من الحادية عشر وحتى الخامسة مساءً..ومما زاد في سعادتي ان حضرت صباحاً زوجة أخي والحقيقة استبشرت خيراً لأنها اشترت لها ولأخواتها حوالي 11-12 كتاباً..ثم توالت الحفلات وكان لي الشرف ان التقي وابنتي العزيزة رؤى وما ارقها إنسانة ..بل وما أرق والدتها واختها وكأنهم كلهم معجونين بالرقة والجمال والأدب ..وكذلك من الوجوه التي سعدت بها لأول مرة دينا "بنت من الزمان ده "وهذه ايضاً حدث عنها ولاحرج ..هادئةورقيقة ..وحالمة ..تخطفك منذ الوهلة الأولى ولاتدعك حتى اللحظة الأخيرة ..لم تتركاني لاهي ولا رؤى وكأنهما قد تبنياني..ومن الوجوه التي سعدت بها من قبل شيرين سامي بالطبع..بشموخها المعهود ..وخجلها الغير متكلف ..وفتحي المزين بروحه المرحة واصراره على ان نذهب معه لتشجيع زبائنه من الجنسين ..وشراء كتبهم ..وأخيراً نوارة المكان ومبعث البهجة ابراهيم رزق وابنته اللذيذة ساليناز ..أما رامي الذي جاء خصيصاً عندما علم بالموعد فكان مفاجأة الحفل ...ولاانسى ابداً ما حييت هذا الإنسان الفاضل الذي أصر على المجيء رغم بعد المكان فهو قادم من مدينة العاشر من رمضان ..وأظنكم عرفتموه ..إنه إبني العزيز محمد متولي الذي حضر الساعة السادسة والربع مساءً لكي يحتفي بي ..لاأدري كيف اشكرك يامحمد ...أما من انتظرتها على شوق ولكنها للأسفلم تتمكن من الحضور فهي شمسنا جميعاً شمس النهار..وان شاء الله يكون لنا لقاء قريب يجمعنا ..ولاانسى بالطبع الأستاذ الفاضل محمد عطية ..الزميل الفاضل في حفل التوقيع ..وكذا احمد فتحي"عشقك ندى..ومحمد صلاح زكريا ..ومحمد الزحاف..وفاطمة علي ماضي ..ومروة زهران ..وياسين احمد سعيد وزميلته داليا"دائرة المجهول ..ويارا جمال الدين "الموقع ادناه" ..أما المفاجأة اجميلة فهي بالطبع من ؟؟؟من؟؟؟من؟؟؟إنها الإبنة الكاتبة المميزة أمل زيادة التي أهدتني كتابها "في الخاطر الذي ربما افتتح قراءتي به .. والتي قدمتني إلى إبني العزيز رامي يوسف "غواص على الطريق "قائلة :ماما زيزي الناقدة الكبيرة ..بصراحة بقيت ابص حواليا اشوف بتقول على مين فمالقتش حد غيري فياليتني اكون عند ظنها بي ..فهي تراني اتفحص الكتب ولا أمر مروراً..وأقول رأيي كما اتبين بلا مجاملة ..فأشكرها كثيراً على تلك المجاملة الرقيقة ..ده يا جماعة كان يوم 2 فبرايروكان يوميها حفل أحمد خالد توفيق ..الحقيقة كان حفل متواضع جداً ماكانش فيه غير 200-300واحد مستنيين التوقيع ايه يعني ييجي إيه ده جنب احتفالي انا ..يعني البركة في القليل بتخليه كتير ..وكل واحد من اللي جم بمية من الناس دوكهم ..ولايهمنا زيزو عندنا ..ايه رأيكم مش كفاية كده النهاردة ونتقابل بكرة على خير ..تصبحوا ..أو بمعنى اصح صباح الخيرعشان دلوقتي الساعة اربعة ونص الفجر ..تحياتي

هناك 28 تعليقًا:

aya mohamed يقول...

اوقات الكلام بيكون فيه روح وحياة
اكتر من الصور
صباحك سعادة ماما زيزى
وانا شفت الصور فى الفيس يوم الحفلة
وكنت فرحانة جدا بيكم وبالكتب
دايما يارب متجمعين ومبسوطين ان شاء الله

شمس النهار يقول...

ياصباح الفل والياسمين
علي اجمل زيزي

كان نفسي اكون موجوده واشوفك بس معلش اللقاء نصيب
وان شاء الله لنا لقاء :)
طلبت الموبايل مغلق !
هطلبك تاني النهارده انا عايزة اااااااااااارغي معاكي :)
بالرغم من الكلمتين الصغيرين اللي قلناهم بس حسيت اني اعرفك من زمان
من اول ماجيت هنا المدونة واناحاسه اني اعرفك من زمان

مصطفى سيف الدين يقول...

كان معرض زاخر بالابداع التدويني
سعيد انك قضيتي اوقات ممتعة
و ألف مبروك لصدور كتابك و ربنا ان شاء الله يوفق حضرتك
و كل معرض و حضرتك بخير

ابراهيم رزق يقول...

zizi العزيزة الذيذة

وحشتينا بقالك كتير مخصمانا
اغنيلك الصلح خير مع بلوجر و لا ايه

مستنين باقى الحواديت على احر من الجمر

تحياتى

الازهرى يقول...

زعلت كتير لما ماجيتيش يوم الخميس فى راديو أرابيسك

كان نفسى أشوفك تانى بعيد عن اليوم اللى كنت مرهق فيه ده

ولو إنى برضه كنت مرهق يومها وجاى من السفر على الفرح على الحفلة :)))

أشوفك على خير دايما

ظلالي البيضاء يقول...

ماما زيزي ..
أكيد أن الشعور بالفرحة يفوق الوصف فالكلمات لا تصف حقيقة المشاعر ..
لكن الفرحة باينة في عينين حضرتك .. وفي كلماتك .. وكلمات المدونات الصديقة اللي اتكلمت عن الحفلة بالصوت والصورة ..
كل التحية وكل التهنئة بهذا الجمع الطيب المبارك ..
حقيقي كنت عزمت آجي المعرض وكنت عملت اتصالاتي علشان تذكرة السفر لكن في اللحظات الأخية تعرقل السفر وقعدت وحدي أهو .. هههه
لكن قلبي كان معاكم .. وعلى طول هوه معاكم ..
يارب يكتبلكم الهناوة والرضا والسعادة .. ويكتب لمصر الأمن والأمان والرفاهية والسلام ..
كل التحية من القلب لأحلى قلب .

ريهام المرشدي يقول...

السلام عليكم
الف مبروك على الكتاب و من نجاح لنجاح يااا رب :) .

Unknown يقول...

سيدتى الكريمة
أسأل الله تعالى أن يديم عليك هذه النعمة الطيبة .....
بارك الله فيك وأعزك

Unknown يقول...

السلام عليكم ورحمه الله .
انا جيت هنا من زمن كدا حوالي سنتين بس ما نسيت طعم الكلام الدسم ولا التلقائيه و البساطه في التعبير ...كتير تشوف واحد اول مره نحس اننا قابلناه قبل كده 100مره .
و علي غرار سوق عكاظ( معرض القاهره )عملت هنا في يلدي بالصعيد الجواني معرض ما انا كمان الكتب محيراني ...هي هي نفس المشاكل ...بس انا احيانا بدفع للناس علشان تاكل ( تقرأ ).
آسف ...ع الاطاله ...و جعت دماغكم .

faroukfahmy يقول...

رائدة مدوناتنا الفاضلة زينب صادف
اباركك لامرين
حفل التوقيع لكتابك الذى لم احضره انا وبناتى لامر خارج عن ارادتنا والدنيا اعذار والوجوب الواجب ان نحضر فانت صاحبة الفضل والواجب لنا جميعا لا انسى حضورك حفل مناقشة الدكتورة جيهان فى رسالتها الميجستيرية
والمباركة الثانية رجوع قلمك الينا الذى اشتقنا اليه كثيرا
تقبلى العذر وان كان فاتك غيابنا فاننا قد فاتنا الكثير والكثيرمن دفء تواجدك وزملائنا الافاضل فى هذا الحفل البهيج
الفاروق

zizi يقول...

حبايبي قبل ماابتدي ارد على اي حد فيكم احب انقلكم مشاعري ..انا بجد باحبكم قوي انا حاسة ان ربنا بيرضيني وبيراضيني قوي بحبكم ..وحاسة معنى المقولة .."رُبّأخٌ لك لم تلده امك"دي واضحة قوي معاكم كلكم انا لقيت فيكم ألأخ وألأخت والإبن والإبنة والعيون اللي بتشع حب وحنان ودفء انا لقيت فيكم كل دا وانا محتاجة لكل دا..معذرة فاضت عبراتي على اوراقي ..اد ايه انتم حلوين بجد واد ايه حاضنني بجد واد ايه محتاجالكم بجد ..دي كلمتي من قلبي لقلب كل واحد فيكم حتى ولو قراني ومالوش تعليق هنا انا حاسة بيكم كلكم وارجعوا لقصيدة ظلالي البيضاء اللي كتبها من حوالي سنتين تعليقاً على رسالة الى ابنتي واللي كملتها معاه انا وانتم تعرفوا انا باحبكم ادايه ..ودلوقتي مع كل واحد وردي على تعليقه ..

zizi يقول...

آية الجميلة..فعلاً ساعات الكلام ممكن يرسم صورة في العمق وليست سطحية لإن الكلام ممكن يوصف المشاعر الداخلية كمان ..وحشتيني يا آية وكنا جايبين سيرتك بالخير انا وابراهيم رزق ودينا"بنت من الزمان ده "ونفسي اشوفك قريب ..

zizi يقول...

شمسي وقمري وسمايا ونجومي ..ماكدبش اللي قال من القلب للقلب رسول ..فاكرة يا شمس لما كنت باكتب عن اسماء الله الحسنى قلتلك في أحد التعليقات انا حاسة انك دلوقتي عاملة مج النسكافيه التمام وقاعدة بتبصي من البلكونة وبنرغي سوا والله ده كان احساسي ومازال اني اعرفك قوي وبكرة تشوفي حانطلع بنعرف بعض قوي قوي ..بس اما اشوفك وانا احكيلك عاللي جرى ..المهم ان شاء الله لينا لقاء قريب واسعد بيكي ..تحياتي

zizi يقول...

مصطفى الغالي ..صحيح لم اسعد بيك يومها لكن سعدت بيك يوم الخميس وكان نفسي اكون معاكم يومها بس فعلاً ماكانش ينفع ..وانا عرفت وشفت من الصور ان الحفل بتاعكم كان حلو وممتع وفيهناس كلهم افاضل ومش عارفة افاضل بينهم ..ودايماً من نجاح لنجاح لك تحياتي وشكري

zizi يقول...

برهوم حاكينا ..يا من لك الهلة والطلة الجميلة باشكرك على مجيك الحفل وباشكرك عشان جبت سالي الجميلة معاك واديني اتصالحت مع بلوجر وبلاها محاكم الطيب احسن ..تحياتي

zizi يقول...

اسامة الغالي العريس الطازج ..انا اللي كان نفسي اشوفك تاني لإنك فعلاً واحشني وكل سنة مرة دي صعبة حبتين لإن بالنسبالي سنة دي كتيرة شوية خليها كل شهر والا شهرين تبقى معقولة ..واشكرك إني شفتك في الحفلة ..ودايما متجمعين في الخير ..

zizi يقول...

ابني العزيز محمد الذهبي ..يامن اعتز بك على البعد ذكرتك قريبا في المعرض وانا اتحدث مع احدهم من دار نينويوقلت لهم انا لي انسان عزيز علي في سوريا ومضينا نتحدث عما يجري لنا ولكم وقانا الله واياكم شر الظالمين ..محمد ممكن تقوللي عنوانك بالتفصيل وانا ان شاء الله احاول ابعتلك نسخة من الكتاب نفسي قوي تقراه وتقولي رأيك ..وياريت تحاول تيجي مصر بس لما الظروف عندنا تتحسن شوية ..تحياتي وشكري

zizi يقول...

ابنتي الحبيبة ريهام ..كان نفسي قوي اشوفك في المعرض واشكرك على كلماتك الرقيقة ودايماً اسمع عنك كل خير ..

zizi يقول...

استاذي الفاضل استاذ محمد ..من دواعي اغتباطي وسروري ان تنير مدونتي من حين لآخر فحضرتك ممن نتيه بهم أن شرفونا بالزيارة ..لي طلب بسيط عند حضرتك ان اتشرف بموبايلك أو ايميلك علني اذا جئت قريباً للأسكندرية ان اتمكن من اهدائك نسخة من كتابي ولك جزيل الشكر ..ولاتخف فلدي الإشراف على التعليقات أعمل من خلاله ..

zizi يقول...

تصور يا فركشاوي ..ان تعليقك أثر فيا قوي ويمكن هو اللي خلاني اكتب الكلمتين اللي قلتهم في أول تعليق ..ايه يارب ده ؟؟دا انا قاعدة بقى ومربعة عند ناس كتير وانا مش حاسة احمدكيارب ..مشاعرك غمرتني بصدقها ودفئها واشكرك عليها وحالاً اخلص اللي في ايدي وحاروحلك مدونتك امسي عليك ودايماً حاتلاقيني هناك ان شاء الله وآمل الاقيك هنا على طول مش كل سنتين مرة المرة دي نفدت وجت على خير المرة الجاية بصراحة مش ضامنة تلاقيني واهو انت وحظك ..تحياتي

zizi يقول...

استاذي الكريم استاذ فاروق ..انا عارفة تماماً مشاعركم ومقدرة ظروفكم وان شاء الله يكون لنا لقاءات قريبة ..تحياتي وشكري لكلماتك الرقيقة ..

Unknown يقول...

إحم إحم متأخره كالعاده :)
بس عارفه إنك مش هتزعلي مني :)
المعرض السنة دي كان أجمل من أي سنة
كان في نور زياده و حُب زياده
كان فيه ماما زيزي و الدفا كُله
مبرووووك و يا رب نقولها لبعض كل سنة
و نتجمع كل سنة على ألف خير
تحياتي و حُبي لأجمل أم

zizi يقول...

ابنتي الحبيبة شيرين ..يا حبيبتي انتي تدخلي في اي وقت بيتك ومطرحك..و
مش عارفة اشكرك ازاي على كل الكلام الحلوده..انتوا اللي كنتم منورين المكان ومدفيينه..ودايماً يارب نشوف بعض في كل حاجة حلوة ..

ظلالي البيضاء يقول...

ماما الغالية ..
يسعدني جداً أن نذكريني ويسعدني أكثر حرصك على إيصال كتابك إلي ..
بل سعادتي بردك فوق الوصف ..
أسهل عنوان لليريد هو من خلال صندوق بريد الشركة التي أعمل بها حالياً على أن يتم ذكر ملاحظة على أي بريد يرسل لي على هذا العنوان "يصل ليد محمد رضوان الذهبي" ورقم صندوق البريد هو : 4539 دمشق
وشرف كبير لي أن تكون لي نسختي من الكتاب موقعةً بيدك الطاهرة ..
بعض الأحبة شق عليهم أن يرسلوا كتبهم بالبريد فأرسلوا البروفة الأخيرة للكتاب كنسخ الكترونية لو كان هذا يرضيكِ ..
ألف ألف شكر سلفاً ..
مع التحية الطيبة ..

Unknown يقول...

سيدتى الفاضلة
السلام عليكم ورحمة الله وبركاته
يسعدنى ويشرفنى دائماً تواجدى فى مدونتك والتى تتميز بطابع خاص يحمل دائماً المودة للجميع....

سيدتى أنا لست من الإسكندرية أنا من بورسعيد.

وهذا هو إيميلى
mhg1962@ gmail.com

وبارك الله فيك وأعزك

رؤى عليوة يقول...

ايه الكلام الجميل والرقيق ده
والله انا كنت طايرة من الفرحة لما شفت حضرتك وعرفتك علطول
حسيت بحنان وماما من يومها بتقولى مامتك زيزى :)

وطبعا بتدعى وعايزة حضرتك تدعى معاها عشان تشوف حضرتك عندنا وبالمرة تخلص منى

يارب ايام وحفلات ومناسبات كتير تجمعنا على خير

دمت بخير يا ست الكِل
( كما ينطقها أحمد اخويا )

Unknown يقول...

مسااااااااااء الفل عليكى انا جيت متأخرة اووى بعد كل الكلام الجميل ده عليا مش هعرف اتكلم بس اقدر اقولكم ان المعرض السنه دى مختلف كليا عن كل سنه لان كان ليا فيه احباب بفرح اوووووى بشوفتهم وانتى اولهم مامازيزى

Unknown يقول...

مستنية رايك فى الرواية واتمنى انها تعجبك وبالفعل كل ما اشوفك كنت بفرح اوووى ربنا ما يحرمنا من تواجدك