قيمنا الجميلة

قيمنا الجميلة

(هذه القصيدة قيلت عام 1991 في مناسبة سأروي تفصيلها بعد أن

تسمعوا القصيدة حتى لا اشتت تفكيركم)

قالوا العلم نور ؛؛؛والنهارده الجو نوراني

كل الأحبة هنا ؛؛؛والفرح وياهم جه وهناني

ناس كبار علماً وخلقاً؛؛؛جايين لبيتنا منورين

م الهنا ..قلت يا أنا ..يانهار أبيض ..يا صلاة الزين

000

حبايبنا ادونا ميعاد ؛؛؛لكن ولا كل المواعيد

من يومها واحنا بنستنى ..؛؛؛وبنتمنى يجينا العيد

وادي العيد وصل وجيتونا ؛؛؛في احلى نهار ..ويومنا سعيد

000

قالوا فيه مسابقة للقيم ؛؛؛لكل المدارس في الهرم

والمسابقة مش بس جايزة ؛؛؛ده شهادة ...أو دي قلم

المسابقة طالبة منا ؛؛؛تزرع في نفوسنا القيم

شيء عظيم ..فكرة نبيلة ؛؛؛وايه نكون من غير قيم ؟؟؟

ياللا ياولاد نقرا المسابقة ؛؛؛ياللا هات ورقة وقلم

تعبوا الولاد ؟؟؟تعبوا

حفظوا الولاد؟؟؟حفظوا

تعبوا همّ وتعب معاهم الأساتذة ...والجميع حفز الهمم

000

وأنا ....أنا وسط الهيصة ديه؛؛؛لقيت نفسي باقول كتير

قلت وماله ؟؟؟يعني هيه ؛؛؛المسابقة معمولة بس للصغير؟؟؟

إزاي ؟؟؟..إزاي وجيلنا هوهمزة وصل بين ولادنا وبين جدودنا

إزاي؟؟؟إزاي وابويا ياما قاللي...كانوا يابنتي ..واحنا كنا

واللي سمعته في يوم او شفته ...لازم اقول لولادي عليه

قيمنا الحلوة ياريت نراعيها ...والشيء الحلو بنبقي عليه

000

ياولادنا في كل مجال ؛؛؛اعملواقيم اجدادكوا في غنوة

دا قبل مانورث بيت أو مال ؛؛؛بنورث عنهم قيمنا الحلوة...

000

اجدادنا قالوا ووصونا؛؛؛ ووصوا أمنا وأبونا

وفي الإنجيل وفي القرآن؛؛؛ياما قروا وياما قرونا

000

عيسى قال:الدين سلام ...الدين محبة ؛؛؛صلواعشان اللي ساءوا اليكم

ومحمد قال:اكظموا غيظكم...واعفوا ؛؛؛ وجاهدوا نفسكمبإيديكم

000

فيه سنة من السنين ؛؛؛فيه عيدين ويا بعض اتجمعوا 1

والناس يوميها استعجبوا؛؛؛إزاي عيدنا ويا عيدهم في ليلة واحدة اتجمعوا ؟؟؟؟؟

عيد ميلاد طه النبي ...ويا عيسى؛؛؛ في ليلة واحدة اتجمعوا ...

وكأن ربك بيقولنا ويقولهم ::

أنا رب عيسى ...ورب موسى ... ورب طه ...اوعوا لغيري تسمعوا ...

000

بيقول إيه ديننا الحنيف ؛؛؛قوللي ديننا بيقول إيه؟؟؟

بيقول :لو حياك واحد بتحية...ترد عليه بأحسن منها

بيقول:الكلمة الحلوة تقولها ؛؛؛أو السكوت احسن منها

مفيش نفاق ..مفيش رياء؛؛؛مفيش كلامعلى فلان قدامه أو في غيبته

مفيش معايرة بحاجة ناقصة ؛؛؛أو حاجة تجرح يوم شعوره أو تبهته

اوعى في يوم تخون عهود؛؛؛اوعى في يوم تنسى وعود

بيقول إيه ديننا الحنيف ؟؟

؟قوللي ديننا بيقول إيه؟؟؟

000

قال الكبير.. هو الكبير؛؛؛روح لحده ووقره

قال الصغير..اعطف عليه؛؛؛اوعى في يوم تستهيفه وتحقره

بيقول إيه ديننا الحنيف ؟؟؟

قوللي ديننا بيقول إيه ؟؟؟

000

اطلب علمك ولو فالصين ؛؛؛لف عليه بلاد وبحار

حب لغيرك ماتحبه لنفسك ؛؛؛ديننا كمان وصاك بالجار

بيقول إيه ديننا الحنيف ؟؟؟

قوللي ديننا بيقول غيه؟؟؟

000

قال لو كان عندك أمرين ؛؛؛نقي دايماً اسهل أمر

دينك أبداًعمره ماكان ؛؛؛دين عسر ..ابداً..ديننا اليسر

بشر دايماً..اوعى تنفر؛؛؛ولا توصم واحد بالكفر

000

هو انت إله كمان حاتحاسب ؛؛وتدخل جنة وتدخل نار ؟؟؟؟

ومهما حاولنا نقول مش عاجب ؛؛؛دي عقول دي والا احجار؟؟؟

000

سنّة مين ورسول مين ؛؛؛اللي قالك خليك جبار

نازل قتل وضرب ونفي ؛؛؛ وباني حواليك الف جدار

بلدك عايزاك عايزة جهودك ؛؛؛طالب كنت ..أو نجار

صلي ...وقت الصلاة حاضر ؛؛؛ وباقي اليوم ذاكر فيكتاب ..أو ابني عمار

000

مش برضه ديننا بيقول كده ؟؟قوللي ديننا بيقول إيه غير كل ده؟؟

وفين احنا من ده أو ده؛؛؛فين احنا والحال بقى كده؟؟؟

000

ناس عايزاها خراب ودمار ؛؛؛ وناس ليلها مالوهش نهار

وولادنا ياعيني..ياعيني عليهم ؛؛؛ضحكتهم بقى فيها مرار

000

ما بين أب يربي .. وأم تحفظ ؛؛؛ومدرس فاضل بيعلم

وبين أحداث جارية ..لافيها قيم ؛؛؛ولا فيها ذمم؛؛؛ولا واحد قادريستفهم!!!!

000

وإيه الحل ؟؟؟؟؟؟؟؟

وقفنا للحظة

حانسيبهم كده والبحر مليان بسباع وقروش ؟؟

والا نعود بيهم للبر ... والبر أمان ...وياعالم حوش؟؟؟

والحل كان.....هو القيم

والنتيجة أكيد حاتبقى قريبة

يوم مانرجع ياولادي للقيم ...

ومن عليها نمحي كل الأتربة

نلقى كل الحب زاد ...والوداد....عالعباد ...بان... ومن غير احجبة

000

يومها نتجمع سوا ....ومفيش سوي ....الحب بيننا والإحترام..

وضحكة صافية م القلوب ...طالعة تجلجل..في الهوا ...حب وسلام ...

وربك فوق...فوق الشعوب ...ماسك السما ...بيحمي الحما ...

وينشر لنا....خير ...ورحمة ...و وئام ...

000

انتهى

1-فيه مرة في احدى السنوات جه مولد النبي يوم 7يناير

تنويه عن هذه القصيدة

مثلما قلت في المقدمة هذه القصيدة كتبتها في 1991 وكنت وقتها ناظرة اعدادي

وكانت فكرة من الأفكار الجميلة ان يقوم توجيه التربية الإجتماعية

بعمل مسابقة لإبراز القيم الجميلة(شفتوا الناس من 20 سنة كانت بتعمل إيه ؟؟)ولقيت نفسي زي مانتوا شايفين باشارك بالقصيدة دي وعارفين يومها التوجيه اداني أيه ؟؟؟؟؟؟؟؟؟؟؟؟؟؟؟؟؟؟؟؟دي مساحة للتخمين .....اداني ميدالية بلاستك مكتوب عليها (مسابقة قيمنا الجميلة)واقولكم على حاجة تضحك على هامش القيم الجميلة:يومها كنت انا لسه ناظرة جديدة وكانت كل الأمور في إيد المديرة مش عشان هو ده الصح لكن عشان كانت هي تحب تستأثربكل الإهتمام واللي حواليها كلهم دول على هامش السيرة فلما يومها التوجيه اثنى على العبدة لله واداني الميداليه ماكان منها الا ان ندهتني -على جنب- وقالتلي وريني كده همّ ادوكي أيه؟؟لأن كانت المنضدة بتاعة التوجيه اللي يقف عندها بيدي الحاضرين ظهره ....وبعدين وريتها الميدالية !!!!!واطمئن بالها عشان هيّ كانت واخدة قلم ....لا والله أنا ما أقصدش ...هيّ صحيح كانت واخدة قلم في نفسها ...بس بالصدفةالبحتةبرضه كانت الجايزة قلم ييجي كده بتلاتة صاغ ....على فكرة تلاتة صاغ ايامها كانت حلوة يعني لما تعرفوا ان ماهيتي انا وغيري كانت ستاشر جنيه وتمانين قرش.....احسبوا انتم بقى النسبة تلاتة صاغ على ستاشر جنيه وتمانين قرش واللي يحسب الأول يقوللي...بس منظرها يومها وهي واخداني على جنب كده كان زي الطفل اللي واخد اخوه على جنب يشوف ابوه اداله ايه احسن منه .....واهي كلها قيم !!!!يا حضرات المديرين والرؤساء اشركوا شعوبكم ...يوه...اقصد موظفينكم معاكم ....لأن الديموقراطية مطلوبة في كل خلية من خلايا المجتمع نبتدي بالأسرة واحنا طالعين ....

 وفي النهايةمش الأحسن ندي للطلبة قيم واهي دي لافيها مسلم ولا مسيحي ولا مين اللي حايقعد في الفصل ومين اللي حاينزل المكتبة ..ده اذا كان فيها مكتبة اصلاً...تحياتي